Shillong, Nohprah 10
Ka Shillong Lajong ka la pynliem noh ïa ka Meghalaya Police da 2-0 kol ha ka semi final kaba ar jong ka lympung ïalehkai SSA Champions Cup 2025 bad ka la jam sha ka final.
Kane ka nam jop ka la wan urlong lyngba ki kol ba la thep da u Ïohborlang L. Lyngkhoi (41) bad u Deibormame Tongper (50).
Lyngba kane ka jinglah ban pynthikna ïa ka jingjop ka Lajong kan pynkhreh ban ïaknieh ïa ka nam lahduh pyrshah ïa ka lahduh jong ka First Division, ka Nongkseh ha ka sngi Saitjaiñ.
Ka Nongkseh ka dei ka kynhun kaba la jop ha ka semi final kaba nyngkong lyngba ka tie-breaker da 4-3 kol pyrshah ïa ka Langsning hadien ba ki la ïakhaid mar 2-2 kol haduh kaba kut jong ka ‘extra time’.
Kumba ka paw ka Nongkseh bad ka Lajong ki la dep ban ïakynduh teng ha kane ka lympung, namar baroh ar ki la don ha ka Group-B, bad ha kata ka jingïakhun ki la kut noh ha ka jingïakhaid da mar 1-1 kol. Te kumta ha ka jingïakhun final, tang kawei ka kynhun ka ban long ka nongjop ha ka sngi Saitjaiñ bad ka jingkhmih lynti ka long ba ka jingïakhun kan long kaba itynnad.
Wat lada ka MLP kam shim la lah ban kynjoh sha ka thong, pynban u Nister Roy Suting uba dei artad u rangapkol jong ka, u la lah ban ïeng ïada bha ïa la ka jong ka kol, ban nym ailad ïa ki khynnah ka Lajong ban ïoh ban thep suk.
Ki bol kiba u Nister u la ïeng ban ïada tyngeh ha kane ka jingïakhun ki dei ki jingpyrshang kiba la mih paw na u Ïohborlang bad kumjuh na u Babysunday Marngar.
Watla katta ruh ka nam ïalehkai kaba bha ka wan na ki khynnah ka Lajong, ha kaba kine ki artylli ki kol ba kane ka kynhun ka la ïoh ban thep, ki long kiba itynnad bad kiba dei shisha na ka jinglah ban ïa mir bha hapdeng ki rangïalehkai shakhmat jong ka, ha kaba ka kol ba nyngkong ka dei ka free-kick ba la shut da u Ïohbor, kaba sam lyngba ki rangïalehkai ka MLP kiba la ïeng kum ka kynroh.
Ka kol kaba ar ka la wan hadien u Riborlang marwei u la ïoh ban rah sted shakhmat ïa ka bol kaba ha ka khyllipmat kaba biang u la khyrwit tyngeh ïa ka bol kaba pynlong ïa u Nister ba un nym lah ban kem ïa ka bad kane ka bol, ka la poi hajan u Deibormame bad pynpar pat ïa ka sha lyndet jong ka kol.
Kum ka kynhun ka MLP ka don ïa ki rangïalehkai kiba khlaiñ, hynrei kim shym lah ban pynkhih jar, ha kaba ka kabu ksiar ka la wan lyngba ka freekick ha ka minit kaba 63 ba la shut da u Everstarly Rynjah, hynrei kam shym la rung sha kol.
Ïa ka nam Player of the Match la ïoh da u Ïohborlang, ha kaba u la ïohpdiang ïa ka momento lem bad ka song pisa kaba T.5000 tyngka na u Chief Secretary barim ka Sorkar Jylla u Bah D.P Wahlang.
Kumba la kdew haneng, ka phainal kan long la sngi Saitjaiñ ha ka por 4:30 janmiet ha SSA Stadium.
