Shillong, Nohprah 14
Ka Nongkseh SS&CC ka la long ka lahduh ha ka SSA Champions Cup, hadien ba ka la lah ban pynliem ïa ka Shillong Lajong FC da 2-1 kol ha ka jingïakhun phainal ha ka sngi Saitjaiñ ha SSA Stadium kaba ha First Ground, Polo.
Ha kane ka jingïakhun la wan sakhi da kumba 12000 hajar ngut u paidbah nongwan peitkai ban pyndap ïa ka stadium hi baroh kawei. Kane ka jingïakhun kaba la pynhun hi jrut ïa kiba bun lyngba ka jinglah ban ïalehkai bha na baroh ar ki kynhun.
Kumba ka paw ka Nongkseh ka la lah ban thaw ïa ka rekod ban long ka kynhun kaba khlem shah rem ha kane ka aïom ha kaba ka la rah ï aka nam lahduh ha ka First Division bad wat haduh ka Champions Cup.
Mar ïa sdang, ka Shillong Lajong ka la pyrshang ban ïalehkai bha ban ban ym ailad ïa ka Nongkseh bad ka la ïoh ban pynkhih jar nyngkong ha ka minit kaba 27 lyngba u Babysunday Marngar. Kane ka shi kol ka la ïaineh haduh kaba kut jong ka kylla step na ka daw ka jingbym lah ban pynphai da ka Nongkseh.
Haba wan ban bteng ïa ka kylla miet u coach ka Nongkseh u Bah Richard Nongneng u la wanrah ka jingkylla ha ka kynhun, da kaba pynrung ïa u Shano Tariang, ban pynkhlaiñ ïa ka bynta ba hapdeng (midfield) kaba plie lad pat ïa ka kynhun ba kan sdang ban pyrshang ban ïoh thep kol, hynrei u rangapkol ka Lajong u Wanteilang Malngiang u la lah ban ïashan tyngeh na ka bynta ka kynhun.
Wat hapdeng ka jingïashan tyngeh haka bynta kaba shadien, pynban hashwa ban wai artad (90+4) ka Nongkseh ka la lah ban pynïakhaid kylla lyngba u Kynsaibor Lhuid. Lyngba kane ka jinglah ban pynïkhaid ka stadium baroh kawei ka la sawa da ka sur ïa risa bad kynhoi da ki nongkyrshan ka Nongkseh.
Lyngba kane ka jingïakhaid, ka la pynlong ïa kane ka jingïakhun ban poi sha ka ‘extra time’. Ha kum kane ka jingïakhun ka Nongkseh ka la thep biang sa shi kol lyngba u rangïalehkai barim ka Shillong Lajong u Hardycliff (120) ban pynlong syndon ïa ka kynhun ban khur syndon ïa ka jingjop.
Da kane ka nam jop ka Nongkseh ka la rah ïa ka khusnam pisa kaba T. 8 lak tyngka, katba ka Lajong ka la ïoh T. 4 lak tyngka ba la sam da u Myntri ka tnat ïalehkai u Bah Wailadmiki Shylla, kumjuh u Bah R.V Lyngdoh, MLA Mylliem ryngkat ki dkhot nongkitkam ka SSA. U Kynsaibor Lhuid ula ïohpdiang ïa ka nam Hello Meghalaya Player of the Final, katba ïa ka nam Top Scorer la ïoh da ki lai ngut ba kynthup ïa u Riborlang L Lyngkhoi (SLFC), Pynshailang Lyngkhoi (MLP FT) bad u Donlad Diengdoh (LFC), kiba la thep mar 6 kol.
