Shillong, Nohprah 14
Ka Mawkynroh SC ka la khur ïa ka jingjop, katba ka Mawdngong SC bad ka Nongspung AYSCSA ki la ïasam mar shi point ha ka lympung ïalehkai First Division Fotball Tournament 2025-26 ba la pynïaid da ka Tyrsad Area Sports Association (TASA).
Ha kane ka jingïakhun kaba la long ha ka sngi Saitjaiñ ha madan Mawlum Tyrsad, ka Mawkynroh ka la pynliem noh ïa ka Umkseh SC da 3-0 kol. Ïa kine la thep da u Toberwell Marngar ha ka minit kaba 57, katba ïa ki ar tylli kiwei pat la thep da u Jeswellborn Kharbani ha ka minit kaba 76 bad 78.
Haba phai sha kawei pat ka jingïalehkai kaba la long kham hashwa hapdeng ka Mawdngong SC bad ka Nongspung AYSCSA ki la ïakhaid mar 2-2 kol.
Ha kane ka jingïakhun ka Nongspung ka la thep kol nyngkong lyngba u Banpynphrang Lyngdoh ha ka minit kaba 23 bad kawei pat la pynbud da u Lansteward Syiemlieh ha ka minit kaba 30. Hynrei hashwa ban kut ka kylla step ka Mawdnong ka la pynphai kyla shi kol lyngba u Sunilstar Kharshiing ha ka minit kaba 40 bad sa kawei pat ha ka kylla miet da u Sunilstar Kharshiing ha ka minit kaba 83 na ka bynta ban ïakhaid mar ar kol.
Kane ka lympung kan bteng biang ha ka 17 tarik ha kaba ka Rangshangkham SC kan ïakhun pyrshah ïa ka Wahlyngkien Sunei ha ka por 11:30 mynstep, katba ka Mawponghong SC ïa ka Thainthynroh SC ha ka por 2 baje nohphai sngi.
