Jowai, Nohprah 14
U Myntri ka tnat ïalehkai ka Sorkar Jylla u Bah Wailadmiki Shylla u la plie ïa ka rynsan ïakura 3rd Fight Night Boxing ba la pyniaid da ka West Jaiñtia Boxing Association ha ryngkat ka jingïatreilang bad ka shlem treikam u District Sports Officer, West Jaiñtia Hills District ha madan Mih-myntdu ha ka janmiet jong ka 12 tarik mynta u bnai.
Kane ka rynsan ïakura, ka long ban kyntiew bad pynshlur ïa ki khynnah naduh kiba dangrit haduh ki samla ban mih sha-khmat ban pynpaw pyr-thei ïa la ka sap ïalehkai bad ruh shi bynta ban ïakhun pyrshah ïa ka jingpyndonkam drok hapdeng samla ki shynrang bad kynthei.
Haba phai sha ka jingïakhun ha ka liang ki shynrang, ha ka jingkhia kaba 48kg, ïa ka takma ksiar la khur da u Amethyst Synnah, katba ïa ka takma rupa la ïoh da u Nineseverius Suchiang.
Ha ka jingkhia kaba 50kg, u Dabetmiki Dhar ula ïoh ban khur ïaka takma ksiat, katba u Marleiki Suchiang ula ïoh ïa ka takma rupa.
Ha ka jingkhia kaba 54kg, u Lewanki Pakma ula khur ïa ka takma ksiar bad u Samehipaya Suting ula khur ïa ka takma rupa.
Ha ka jingkhia kaba 60, u Ram Lyngdoh ula khur ïa ka takma ksiar, katba u Rang I Man Lamin ula khur ïa ka takma rupa.
Haba phai sha ka liang ki kynthei ha ka jingkhia kaba 52kg, ïa ka takma ksiar la khur da ka Dakahipaya Lyng-doh, katba ka Banisha Makri ka la khur ïa ka takma rupa.
