Agartala, Nohprah:
U Manik Saha, Myntri Rangbah jong ka Tripura, ula pynbna ba ka sorkar jong u, kan rah sha ka ïingbishar ba ha khlieh duh, ban pan jingbit ban plie biang ïa ka mukotduma pynïap briew ha Kalyanpur, da kaba batai ïa kane kum ka sienjam kaba donkam ban pynpoi ïa ka jingbishar bahok, hadien jan laiphew snem jong kane ka jingshah pynïap.
Haba kren ha ka 12 tarik, Nohprah ha ka prokram kaba rakhe ïa ka jingdap shisnem jong katei ka jingshah thombor, u Saha u la ong ba ka sorkar ba la ïalam da ka BJP ka angnud ban bud ïa ki lynti ka aiñ ha kaba ïadei bad kane ka jingpynïap pathar ha Kalyanpur Bazar Colony ha Khowai distrik, ha kaba 26 ngut ki briew ki la shah siat ïap ha ki riew kieng atiar ha ka 12 tarik Nohprah, 1996.
“Ka sorkar jong ngi kan ujor sha ka ïingbishar bahakhlieh duh, ban pan jingbit ban plie biang ïa ka mukotduma pynïap briew ha Kalyanpur ban pynthikna ïa ka hok”, la ong u Myntri Rangbah ka jylla.
Kane ka jingshah thombor ka dang long kawei na ki jingjia jong ki kam thombor ba shyrkhei jong ki lehnoh kaba la pynïap bun briew tam ha ka histori jong ka Tripura.
Ki briew kiba don tiar ïaleh ki la ker kut ïa ka shnong ha ka por miet bad ki la siat ïa ki nongshong shnong katba ki dang thiah. Kitei ki briew kiba la shah pynïap, ki kynthup ïa ki shynrang, kynthei, khynnah bad tymmen, ki dei na ka jaidbynriew Bengali Hindu.
U Saha u la ong ba katei ka jingjia, kaba la jia 29 snem mynshwa, ka la “pynkyndit ïa ka jaitbynriew baroh kawei”. Hadien ba u la ai burom da ki syntiew sha kito kiba la shah pynïap, u la ong, “Nga pan ïa ki jingkyrkhu jong ki ban ai bor ïa nga ban ïakhun na ka bynta ka hok. Baroh ki tip mano ba don ka jingkitkhlieh halor kane.”
U Myntri Rangbah u la kynnoh ïa ka sorkar ba la ïalam da ka CPI(M) ha kata ka por ba kam shym la lah ban khanglad ïa katei ka jingshah thombor bad u la pynlong ïa ka jinghiar thma kaba jur ha ka saiñ pyrthei ïa katei ka seng.
U la kynnoh ba ki komunist ki don jingïadei bad ka jingleh donbor bad ka jingpynshitom beiñ, bad u la pynpaw ïa ka jinglyngngoh ïa ka jingbteng jong ka CPI(M) ha ka ïingdorbar thawaiñ jong ka jylla.
“Nga sngewsih ba ka CPI(M) ka dang don 10 ngut ki MLA ha ka ïingdorbar. Ka long kaba phylla ba ki dang lah ban shah jied. Kim ju kren ïa ki paidbah;ki kren tang ïa ki dkhot ka kynhun jong ki”, u la ong.
U Saha u la kynnoh ruh ba ki don 69 ngut ki briew kiba la shah pynïap tang ha South Tripura ha ka por ba ka CPI(M) ka dang synshar.
Haba pynpaw ïa ka jinglong jingman jong ka sorkar kaba mynta ha ka liang ka jingïada, u Myntri Rangbah u la ong ba ka jingsuk ka la wanphai biang ha ka thaiñ hadien ba ka BJP ka la wan ha ka bor.
U la kdew sha ki 12 tylli ki jingïateh ba la ïasoi da ka sorkar pdeng kiba thmu ban wanrah ïa ki kynhun lehnoh sha ka lynti kaba kongsan.
“Ki lehnoh kiba la pynïap briew bad kiba pynleit jingmut ha ki kam thombor kin ym lait”, la ong u Saha.
“Wat mynta ruh don napdeng kita ki lehnoh kiba trei da kaba deng mask. Ka sorkar jong ngi kan pyrshang ban pynshitom ïa ki.”
