Itanagar, Nohprah:
Ka jingwad bad pyllait im jong ki bun tylli ki kynhun ha Anjaw distrik, ha kaba kawei ka trok rit kaba kit 21 ngut ki briew na Assam ka la hap shapoh ka riat bah kaba jylliew bha, la pynkut noh da kaba pynkut noh da ka bor synshar distrik ha ka lah sngi U Blei, ka 15 tarik u Nohprah.
Katkum ka jingïathuh jong u Deputy Commissioner ka Anjaw u Millo Kojin, la ïoh ban sei ïa 20 tylli ki metïap bad uwei uba lait im la pyllait im hadien ka jingpyntreikam kaba jur kaba la neh saw sngi da ki kynhun ïarap ïa ki jingjia ba sngewsih.
Ïa kane ka jingpyntreikam kaba la sdang naduh ka 11 tarik u Nohprah, la pynsangeh noh da kaba thikna ha ka por 10 baje mynstep jong ka lah sngi U Blei hadien ba la wad bniah bha ïa ka jaka ba jia ka jingjia aksiden hajan Lailiang kaba jngai kumba 40 km na Hayuliang sub-division.
Ki khubor kiba kham mynshwa ki la pynpaw ba ki don 22 ngut ki nongbylla kiba don ha katei ka kali, hynrei u heh pulit jong ka Assam’s Tinsukia District u la pynthikna ba ki don 21 ngut ki briew kynthup ïa u nongñiah kali.
Kane ka jingjia aksiden ka la jia ha ka miet jong ka 8 tarik u Nohprah ha shilynter ka surok bah Hayuliang-Chaglagam. Katei ka kali, kaba kit ïa ki nongbylla na Tinsukia distrik, ka la hap ha ka riat kaba jylliew. Kane ka jingjia ka la paw pyrthei tang ha ka janmiet jong ka 10 tarik u Nohprah ha kaba uwei u briew uba la mynsaw u la poi ha kawei ka jaka treikam ki pulit Border Roads Task Force (BRTF) kaba don ha marjan katei ka jaka bad la pyntip sha ki bor ba dei khmih.
