Shillong, Nohprah 16
Ka long ka sngi sdang kaba la pynkhih win bha ïa ka kynhun ïalehkai jong ka Meghalaya ha ka jingsdang jong ka jingïalehkai pyrshah ïa ka Mizoram ha ka U-19 men’s Cooch Behar Trophy 2025-26, ha ka sngi Ba-ar ha Anand kaba ha Gujarat.
Hynrei shwa ba kiei kiei kiba kham sniew kin wan jia ha kane ka kynhun, u Rudra Singh Rathor Rathor (55 na ki 88 bol) bad ki rangïalehkai ba kham shadien, ki la pyllait im ïa ka kynhun ba kan lah ban kamai palat ïa ka ar spah ron.
Ha kane ka jingïakhun ka Meghalaya kaba la jop ïa ka jingkynting pisa (toss) ha kaba ka la kam trai ban tied nyngkong, ha kaba ka la shah pynhap 7 wiket bad kamai tang 132 ron, kaba ha shwa ba kiei kiei baroh kin sdang kylla khongpong, u Rudra u la lah ban pyllait ïa ka kynhun bad bynrap lang sa u Mannan Surana ba la kamai 31 ron bad u Dipayan Nandi (37 ron), Mewankitbok Kharpuri (21 ron) Grish Raj Ray (16 ron na ki 5 tylli ki bol) kaba pynlong ïa ka Meghalaya ba kan kamai 219 ron.
Haba la wan ban sdang pat ïa la ka jong ka pali ban tied, ka Mizoram ka la lah ban kamai 129 ron hadien ba ka la hap noh 5 wiket.
Kane ka dei ka jingïakhun ba kongsan tam bha ïa ka Meghalaya ba kan khur ïa ka jingjop ka jong ka. Hadien ba la wan pat ban kawang bol, u Namewanki Pakynteiñ (3/25 na ki 9 overs) u la lah ban khur lai na ki saw tylli ki wiket pyrshah ïa ki nongtied ka Mizoram, bud pat sa u Mewankitbok (1/27), Gaurav Narleng (1/27) ki la pyndep hok ïa la ka jong ka kamram jong ki bad ban buh ïa ka kynhun hapdeng ka thong ban ïakhun.
U Malsawmmuanzela u la lamkhmat ïa ka kynhun ka Mizoram ban kamai 32 ron ba la wan na ki 26 tylli ki bol.
Kumta kaba sah na kane ka jingïakhun ka long ba ki nongkawang bol ka Meghalaya kin bteng ïa ka jingïalehkai kaba bha jong ki ban lah ban pynhap kham sted ïa ki wiket ba sah jong ka Mizoram.
