Shillong, Nohprah 16
U Myntri ba dei khmih ïa ka tnat ïalehkai jong ka sorkar West Bengal u Aroop Biswas ha ka sngi Ba-ar u la hiar shuki noh halor ka jingkulmar ha ka jingwan ïuhkjat u Lionel Messi ha Salt Lake stadium myn ha ka 13 tarik mynta u bnai.
Utei u Myntri u la aiti ïa ka shithi ïehnoh kam hakhmat ka Myntri Rang-bah ka Mamata Banerjee, kaba la pdiang ïa kane ka jingkyrpad jong u.
Na ka liang ka sorkar Bengal ka la pan jingpynshai na u DGP lem bad ki heh ophisar halor ka jingbym lah ban teh lakam ha katei ka jingwan utei u khlur ïalehkai na Argen-tina ha Salt Lake Stadium.
“Kat kum ka shithi ba la pyndait lang, nga sngew -nguh ïa ka jingsngew bad jingthmu jong u Myntri ba dei khmih ïa ka tnat ïalehkai ban tyrwa ïa ka jingïehnoh na katei ka kam ba u bat na ka bynta ka jingtohkit halor ka jingjia ha Vivekananda Yuva Bharati Krirangan (VYBK) ha ka 13 tarik u Nohprah, 2025,” la ong kat kum ka shithi ba la soi da ka Myntri Rangbah.
Ka Banerjee ka la bynrap ba u Biswas “u dei hok (ban ïehnoh kam) bad tad haduh ban da kut ka jingtohkit bad ïa mynta shipor ïa ka tnad ïalehkai yn khmih shwa da ma nga”.
Katei ka jingjia ïakulmar ka la mih ha ka Salt Lake Stadium ha ka 13 tarik namar ba ki nong-kyrshan phutbol ki la pynjulor ïa ka madan hadien ba u Lionel Messi u la paw tang shiphang ha katei ka stadium. Ki nongpynïaid ïa kane ka prokram kynthup ïa u Myntri ki la ker sawdong ïa u Lionel Messi bad ki nongpeitkai kiba la thied tiket ha ka dor kaba rem ki la bitar lep hadien ba kim shym la lah ban ïohi ïa utei u khlur ïalehkai phutbol.
Te kumta ka sorkar jong katei ka Jylla ka la pan jingpynshai na ki heh ophisar naduh u Director General of Police u Rajeev Kumar, u Police Commis-sioner ka Bidhannagar u Mukesh Kumar lem bad u Principal Secretary ka tnat ïalehkai u Rajesh Kumar Sinha.
La thaw ïa ka Special Investigation Team (SIT) ba kynthup ïa u Additional Director General of Police (Law and Order) u Jawed Shamim, u ADG South Bengal u Supratim Sarkar, u Director (Security) u Peeyush Pandey bad Barrackpore Police Com-missioner Muralidhar.
Nalor kata, ka sorkar ka la sospon ïa u DCP ka Bidhannagar u Aneesh Sarkar bad sdang ïa ka jingtohkit jong ka tnad pyrshah ïa utei u ophisar.
Shuh shuh ha katei ka 13 tarik u Nohprah ka sorkar West Bengal ka la thaw ïa ka kynhun tohkit ba la lamkhmat da u Justice (retd) Ashim Kumar Ray.
