Mawkyrwat, Nohprah 16
Ka kynhun ïalehkai jong ka Ditumtum SC ka la ïoh ban khur ïa ka nam lahduh ha ka 2nd Football League Tournament 2025 ba la pynïaid da ka Southern Border Sports Association ha madan Balat, South West Khasi Hills District hadien ba ka la lah ban pynliem noh da 2-0 kol ïa ka Nongthymmai SC ha ka jingïakhun final kaba la long ha ka lah sngi U Blei.
Ka jingthmu jong katei ka synjuk ban pynlong ïa kane ka lympung ïalehkai ka long ban kyntiew ïa ki sap ki phong jong ki khun samla napoh ka thaiñ Ranikor.
Ha kane ka lympung la wan ban ïashim bynta haduh 32 tylli ki kynhun na kylleng ki bynta jong ka Ranikor Civil Sub-Division.
Ka Ditumtum SC kaba la rah ïa ka nam lahduh, ka la ïoh khur ruh ïa ka khusnam pisa ka ba T.1 lak tyngka ryngkat ka trophy, katba ka Nongthymmai SC kaba wan ba-ar, ka la ïoh T.50 hajar tyngka.
Ïa kane ka lympung la wan ban pynhap pyrda da u MLA ka thaiñ u Bah Pius Marweiñ kum u kongsan bad uba long ruh ha kajuh ka por kum u President ka Southern Border Sports Association, ha ryngkat ka jingdonlang u Bah Narayan Thongni, Secretary, ki dkhot ka SBSA bad kiwei kiwei.
Haba ai jingkren u Bah Pius Marwein u la ai khublei kyrpang ïa ki nongpynïaid jong ka SBSA kiba la pynlong ïa ka lympung ban kyntiew ïa ki samla donsap jong ka dong ka thaiñ ha ka kam ïalehkai bad lyngba kane ka lympung ka synjuk ha ki snem ban wan ka don ruh ïa ka thong ba kan pynlong noh da ki division league man la u snem.
