Shillong, Nohprah 16
U rangheh ksah ka Jylla u Edmund Arnold Myrthong u la khur ïa ka takma ksiar ryngkat bad ka nam ‘Overall Trophy’ ha ka Mr. & Ms. India 2025 ba la pynïaid da ka World Fitness Federation kaba la long ha ka 14 bad 15 tarik mynta u bnai ha Chandigarh.
Ka jingïoh pdiang u Arnold ïa katei ka nam ka dei ha ka kyrdan ïakop jong ka Denim Jeans Model ha ka liang ki shynrang.
Kumjuh u Ebenaser Khongsit u la khur ïa ka takma ksiar ha ka Classic Bodybuilding bad wan basaw ha ka Senior Men’s Bodybuilding. Ha ka Junior Bodybuil-ding, u Elnathan A. Warjri u la khur ïa ka takma rnong bad basaw ha ka Junior Bermuda Beach Model.
Haba phai sha ka liang ka Sports Model jong ki kynthei, ka Kong Michel Syiemlieh ka la khur ïa ka takma ksiar, katba ka Kong Reemaka Kharumnuid ka la wan basaw ha ka Fitness Glamour jong ki kynthei.
Ïa kane ka kynhun la synran lang da u President ka Meghalaya Bodybuilding and Fitness Association u Bah Flanagan Kharwanlang bad ka Team Manager Kong Alina Sansha Kharwanlang.
Ki la don haduh 195 ngut ki nongshim bynta kiba la wan na kylleng jong ka ri India.
