Shillong, Nohprah 16
Ka Meghalaya Football Association (MFA) kan pynbna mynta ka sngi Balang ïa ki kyrteng ki rangïalehkai ki ban mihkhmat ïa ka Jylla ha ka lympung ïa knieh ne ‘qualifying round’ jong ka 79th National Football Championship na ka bynta ka Santosh Trophy ka ban long ha ka nongbah Shillong.
Ha katei ka kynti ka Meghalaya kaba la don ha ka ka Group-E, ha kaba kan ïakhun nyngkong pyrshah ïa ka Sikkim ha ka 19 tarik u Nohprah bad kawei pat ka jingïakhun kan long pyrshah ïa ka Arunachal Pradesh ha ka 23 tarik u Nohprah. Ïa kine ki jingïalehkai la thmu ban pynlong ha SSA Stadium kaba ha First Ground, Polo.
U coach kane ka kynhun u Bah Khlaiñ Pyrkhat Syiemlieh lem bad Bah Cliff R. Nongrum, Vice-President ka MFA, haba pynpaw ha ki lad pathai khubor ha ka sngi Ba-ar ki la ïathuh ba ka jingïakilan ne ka practice kaba pura ïa ka kynhun ka dangsdang ha ka lah sngi U Blei bad ki rangïalehkai ki ban shah jied ki bun bha ban mihkhmat ïa ka Jylla, hynrei baroh kine ki rangïalehkai ki la long ba la pynkhreh na ka bynta kane ka lympung.
Ïa kine ki rangïalehkai, ka MFA ka la ïoh ban jied na ki lympung ïalehkai kiba dangshu dep bad bynrap ba ha ka sngi Balang yn sa lah ban pynbna ïa ki kyrteng ki rangïalehkai ki ban mihkhmat ïa ka Jylla.
Haba kylli la don ne em ki rangïalehkai kiba tbit bad kiba kynsai, , u Bah Khlaiñ u la pynpaw ba ki don beit bad ki don ruh ki ban dangwan ban ïasoh sha kane ka kynhun ba la khot pyrshang biang ha ka sngi Balang.
Kumban shu pynpaw ba dang ha ka sngi Saitjaiñ jong ka taïew kaba la lah ka Shillong Sports Association ka la lah ban pynkut ïa ka Champions Cup kaba la rah da ka Nongkseh SS&CC, hangne na ka liang Bah Cliff u sngew ban ong ba kane kan ïarap shibun bha ban pynkhreh ïa ka kynhun, hynrei u bynñiaw ba ka por pat ka long kaba la thmit palat, kaba hangne kum ka kynhun, kam ïoh ïa ka por ba kylluid ban pynkhreh janai bha, kaba ha kane ka kynti, la ïoh por sa tang ar sngi, kaba lah ban buh jingeh ïa ka kynhun ba kan lah ban ïa mir bad sngewthuh jingmut bha hapdeng ki rangïalehkai ban don ha ka kynhun.
Watla katta ruh na ka liang Bah Cliff u pynpaw ba kum ka kynhun kan pyrshang katba lah ban ïoh rung na kane ka lympung ïaknieh sha ka wat kaba khatduh (main round).
Lah ban kdew, ka Meghalaya ka la lah ban jam sha quarter final ha ka wat kaba khatduh jong ka Santosh Trophy 2024-25, hynrei kam shym la lah ban jam sha semi final hadien ba ka la shah rem noh ha ka Services.
