Agartala, Nohprah:
Ki pulit jong ka tnat Government Railway Police (GRP) ha ka step jong ka sngi Ba-ar, ha ka jingkhynra ba man ka por ba la pynlong ryngkat bad ki shipai Border Security Force (BSF) ha Udaipur Police Station jong ka Tripura Gomati District, ki la kem ïa arngut ki nong Bangladesh na ka jaka jong katei ka station.
Katkum ka jingong jong ki briew jong ka GRP, kitei ki arngut ki la paw ba ki jubab kyllaiñ ha ka por ba kylli jingkylli bad ki la ai ïa ki jingkren ki bym ïahap ha kaba ïadei bad ka jinglong jong ki.
Hadien ka jingtohkit kaba slem, ki la kam ba ki dei ki trai ri Bangladesh kiba la wan rung be-aiñ sha India ban wad kam.
Kine ki briew kiba la shah kem ki dei kiba la tip kyrteng kum u Md Ibrahim (34) bad u Shakib ul Hasan (18), baroh arngut ki dei kiba shong ba sah ha Rajshahi distrik ha Bangladesh.
U Md Ibrahim u la ïathuh ba u la rung sha Tripura kumba lai bnai mynshwa ban wad kam wad jam.
U la kam ba u la trei kum u nongshna maw ha ki katto katne ki jaka, kynthup ïa ka Charilam ha Sepahijala distrik, ka thaiñ Battala jong ka Agartala ha West Tripura distrik, bad ha Udaipur ha Gomati distrik.
U la ïathuh shuh shuh ba u dang leit sha Odisha na ka bynta ka kam ha ka por ba u shah kem.
U Shakib ul Hasan, ha ka jingtohkit, u la pynpaw ba u la rung sha Tripura lajan shisnem shiteng mynshwa da ka jingïarap jong ki nongkhaïi. U la ong ba u dang leit sha Chennai ban wad ïa ki lad kamai.
Ki heh pulit ki la pynpaw ba baroh arngut ki briew ki la shah kem ban tohkit bniah ban pynthikna ïa ki jingtip ba bniah ha kaba ïadei bad ka jingrung beaiñ jong ki, ka jingleit jingwan jong ki, bad ka jingdonkti jong ki agent ne ki nongkhaïi. La sdang ïa ki rukom treikam katkum ka aiñ.
