Guwahati, Nohprah:
Ka tnad ba dei khmih ïa ki khlaw ka dang pynkhreh ban sdang ïa ka jingpynkynriah ïa bun ngut ki briew kaba thmu ïa ki nongrung be-aiñ ha ki jaka khlaw ba bunjait jong ka distrik Hojai ha Assam, kynthup ïa ka khlaw Jamuna Maudanga Reserved Forest kaba hap hapoh ka South Nagaon Forest Division.
Ki heh sorkar ki la ong ba ki nongwan rung tuh ki la shim ïa ki jaka khlaw kiba heh ha kine ki phew snem ba la dep.
Ki bor synshar ki kynnoh ba ki nongwan rung tuh ki la pynkhuid ïa ki khlaw ki btap, ki la pynkylla ïa ka jaka sha ki kper sohjew, ki la tih ïa ki pung ban ri dohkha, bad ki la leh ïa kiwei kiwei ki kam pyrshah ïa ka imlang sahlang.
Kum ka jingpynrem, ka tnad khlaw ka la pynjur ïa ka jingpyrshang ban shim biang ïa ka jaka bad ban ïada ïa ka mariang jong ka khlaw.
Ha ka 11 tarik u Nohprah, la pynlong ïa ka jingjurip kaba jur ïa ki jaka ba shah ktah da u Forest Department’s Special Principal Secretary, MK Yadav, ryngkat bad ki heh ophisar.
Ha kane ka kynhun jurip la kynthup ïa u Senior Superintendent of Police jong ka Forest Protection Force, u Hojai Additional Superintendent of Police, u Divisional Forest Officer (South Nagaon), u Nayan Jyoti Rajbongshi, u ophisar ka Daboka Circle, u ophisar ba dei peit ïa kiwei pat ki heh jong ka tnat pulit jong ka Daboka distrik.
Ka kynhun ka la jurip bad buh dak ïa ki jaka ban pynkynriah, kynthup ïa ka Udmari, ka shnong Jamuna, ka shnong Ganiarpar, bad ki jaka ba marjan hapoh ka khlaw ba la buh kyrpang jong ka Jamuna Maudanga, kaba mynshuwa ka dei ka bynta jong ka khlaw ba la buh kyrpang jong ka Daboka.
Ki heh sorkar ki la kdew ba ha kine ki 30 snem ba la dep, ki nongwan rung tuh ki la pynjot ïa ki dieng bad kiwei kiwei ki marpoh khyndew ha kylleng ki jaka khlaw kiba don kumba 6,000 bigha.
Ki la tei ruh ïa ki ïing kiba neh bad ki la shong la sah ha ki longïing, kaba la pynmih ïa ka jingsngewkhia kaba jur ïa ka mariang. Ki kam rep ki la nang kiew shuh shuh ha ki jaka ba la shah ktah.
Ha ka jingjurip, ki heh ki la ïakren ïa ki buit bad ki plan treikam ban pynthikna ïa ka jingpynkynriah ïa ki briew kaba ryntih bad kaba treikam.
Ka tnad khlaw ka la dep ban ai jingpynbna sha ki 1,250 tylli ki longïing kiba shong palat 5,500 bigha ka jaka khlaw. Kine ki jingpynbna ba la phah ha ka 10 tarik u Risaw, ki la ai por shibnai ïa ki nongshong shnong ban pynlait ïa katei ka jaka khlaw.
Katba ki don ki longïing kiba la ïathuh ba ki la mih noh da ka mon sngewbha, kiba bun ki dang ïai bteng ban sah ha ka jaka ba la shah ktah, da kaba kdew ïa ka jingbym thikna halor ka jingpynkynriah jaka bad ki lad kamai. Ki tyllong khubor ki la pynthikna ba ka tnad khlaw, ha ka jingïatreilang bad ka bor synshar jong ka Hojai, ka lah ban sdang ïa ka jingpynkynriah briew ha kano kano ka por ban pynïoh biang ïa ka jaka khlaw ba la buh kyrpang bad ban ïada ïa ka mariang.
