Shillong, Nohprah 17
Ka Meghalaya ka la buh ïa ka thong kaba 248 ron pyrshah ïa ka Mizoram ba kan jop ïa ka jingïakhun ha ka lympung ïalehkai U-19 Men’s Cooch Behar Trophy, kaba la long ha Anand, Gujarat.
Haba wan ban bteng ïa ka pali tied ba nyngkong kaba long 129 ron na ka bynta 5 wiket, ka Mizoram ka la shah pynhap noh ki wiket ba sah hadien ba ka la lah ban kamai tang 177 ron, kaba wan hadien ba ka Meghalaya ha ka pali ba nyngkong jong ka, ka la lah ban kamai 219 ron.
Na ka liang u Malsawmmuanzela uba la kamai lypa 32 ron, ha ka sngi Balang u la lah ban kamai tang shi ron hashwa ba un shah pynkhyllem noh ha u Angkit Tamang (2/14), hadien kane u Eric u la ïeng ïakhun da kaba u la lah ban kamai 22 ron, hynrei um shym la ïoh ïa ka jingkyrshan na la ki paralok, kaba pynlong ïa ki ban duna da kumba 42 ïa ka ron ba la lah ban kamai ka Meghalaya ha ka pali ba nyngkong.
Ha kane ka kynti, ka Meghalaya kam shim la pyndonkam pura ïa u Namewanki Pakynteiñ, pynban u danglah pat ban ïai bteng ban bol bha tad haduh ba u la ïoh ban khur 3 wiket na bynta 25 ron, ïa kaba la bynrap lang da Mewankitbok Kharpuri (2/43), Gaurav Jyoti Thakuria (1/0), Sameer Choudhury (1/12) bad Gaurav Narleng (1/27).
Haba wan ban sdang ïa ka pali tied kaba ar, ka Meghalaya ka la pyrshang ban ïakhun kham suki hadien ba u Mannan Surana (27), Sameer (24) bad Dipayan Nandi (57), ki la kamai ïa ki ron kiba ka kynhun ka donkam, hynrei ka jingeh ba la ïakynduh pat hangne ka long ba ka Meghalaya kam lah ban ïoh ïa ka jingkamai ron paralok kaba heh, hadien ba ka la lap ba hap 7 wiket bad ka ron ba la kamai ka long tang 148 ron, hynrei shwa ba kiei kiei kin lam sha kaba kham eh, mih madan ka jingkamai ron paralok ba 40 ron na ka bynta ka wiket ba phra hadpeng u Rudra Singh Rathor (27) bad Heiyoomiki Ryng-khlem (35 not out), ha kaba kane hi ka la pynskhem ïa ka Meghalaya bad ba kan lah ban jam biang sa shisien palat ïa ka arspah ron
Ka pali wan tied kaba ar ka Meghgalaya ka la kut thik ha ka por ba dei ruh ban pynkut noh ïa ka sngi kaba ar jong ka jingïakhun, ha kaba ka Mizoram, kam shim la ïoh satia ïa ka lad ba kan wan ban beh ïa kne ka thong, kaba da kylla, kane ka jingïakhun kan jam pat sha ka sngi kaba lai kaba hangne baroh arkynhun la khmih lynti ba kin ïa shat ïa la ki jong ki khmat ba kin kthong ïa ka nam jong ka jingjop.
