Shillong, Nohprah 17
Ka lympung ïalehkai Third Division Cricket League 2025 ba la pynïaid da ka Shillong Cricket Association (SCA) ka la bteng biang ha ka sngi Balang ha kaba ka Rising CC bad ka Super Challanger ki la khur ïa ki jingjop.
Ha ka jingïakhun kbaa nyngkong, ka Rising ka la pynliem noh ïa ka SMCA da 4 wiket. Ka Rising kaba la jop ïa ka kynting pisa, ka la ailad ïa ka SMCA ba kan tied nyngkong ha kaba ka la kamai 185 run bad shah pynkhyllem 6 wiket ha ki 20 over. U Tomu u la long u nongtied uba la ïoh bun eh da kaba kamai 65 run na ki 45 bol. Katba u Altaf u la khur 1 wiket na ka bynta 4 over bad 43 run.
Haba wan shimti ïa ka pali kaba ar, ka Rising ka la lah ban kynjoh sha ka thong da kaba kamai 186 run bad shah pynkhyllem 6 wiket ha ki 20 over. U Bikash Lama u la khyrwit ïa ka shiteng spah kaba 56 run na ki 34 bol. Katba u Imroz u la khur 2 wiket na ka bynta 4 over bad 36 run. Ïa ka nam Player of the Match la ïohpdiang da u Bikash Lama.
Haba phai sha kawei pat ka jingïakhun kaba ar, ka Super Challanger ka la jop da 4 wiket ïa ka Sporting United. Ka Sporting United kaba la shimti ban tied nyngkong, ka la kamai 223 run bad shah pynhap 5 wiket ha ki 20 over. U Karan Chettri u la long u nongtied uba la ïoh bun eh da kaba kamai 87 run na ki 55 bol. Katba u Bikram Pradhan u la khur 2 wiket na ka bynta 4 over bad 31 run.
Haba wan shimti ïa ka pali kaba ar, ka Super Challanger ka la kynjoh sha ka thong da kaba kamai 224 run bad shah pynhap 6 wiket ha ki 19.3 over. Kane ka la wan lyngba ka jingïalehkai bha u Dilwar Kurbah uba la ïoh ban khyrwit 89 run na ki 33 bol. Katba u Pawan Kumar Singh u la khur 2 wiket na ka bynta 4 over bad 36 run. Ïa ka nam Player of the Match la khur da u Dilwar Kurbah.
