Imphal, Nohprah:
Ki bor pahara ha Manipur ki la ïoh kurup ïa ka jaka buh tiar siat ha ka jingkhynra ha Churachandpur distrik, wat ha ka por ba u Director General of Police (DGP), Manipur, u la pynlong ïa ka jingpeit bniah kaba hakhliehduh ïa ka jinglong jingman jong ka jingpahara ha katei ka distrik.
Katkum ka tyllong khubor ba la ïoh lum, la ong ba ha ka 16 tarik u Nohprah, ki bor pahara ki la ïoh kurup bun tylli ki tiar ïaleh na ka bynta jong ka lum jingtep jong ka shnong Khaopijang kaba hap hapoh ka jingpeit jong ki pulit jong ka Churachand-pur Police Station. Ki tiar kiba la ïoh kurup ki kynthup ïa kawei ka suloi AK kaba don magazine, kawei ka suloi MA-3 MK II kaba don magazine, kawei ka suloi INSAS kaba don magazine, bad kawei ka suloi .315 kaba don magazine. Ka jingtohkit kaba kham bniah ka dang ïaid sha-khmat ban pynthikna ïa ka tynrai jong ka jingwan ki tiar ïaleh ba la ïoh kurup bad ban ithuh ïa kiba donkti.
Hashwa kane, ki bor pahara ha ka lah sngi U Blei, ki la pynlong ïa ki jingïatreilang ha kylleng ka jylla Manipur, kaba la pynlong ban kem ïa lai ngut kiba la kynnoh ba ki dei ki dkhot ba trei shitom jong ki kynhun lehnoh ba la khang pyrshah na ki distrik bapher bapher, la ïathuh ki heh sorkar.
Ha Imphal West distrik, uwei u Sergeant ba dang shakri jong ka seng KCP-Taibanganba u la shah kem na ka thaiñ Heirangoithong kaba hap hapoh jong ka Singjamei Police Station.
Une u briew uba la shah kem u dei uba la tip kyrteng kum u Thokchom Santosh Meitei (37), uba la tip ruh da ka kyrteng Tampakngakpa bad u Nanao uba shong basah ha Heirangoithong Awang Maibam Leikai. Na kti jong u la ïoh kurup ïa kawei ka Mobile Phone.
Ha ka jingkhynra ba kyrpang ha kane kajuh ka sngi, ki bor pahara ki la kem ïa uwei u nongbud jong ka seng People’s Revolutionary Party of Kangleipak (PREPAK-PRO), jong ka kynhun G-5, na ka jaka jong ka Loktak Project Gate kaba hap hapoh jong ka Bishnupur Police Station ha Bishnupur distrik.
Une uba shah kynnoh, ïa uba la tip kyrteng kum u Louriyam Thoi Meitei ba la sin Korou (26), uba shong basah ha Bishnupur Ward No. 3 bad la lap ba u don ka mobile phone bad ka sim card, ha kaba la kurup ha ka jingkhynra.
Sa uwei pat u dkhot ba trei shitom jong ka PREPAK la kem na Kiyamgei Maning Leikai kaba hap hapoh Irilbung Police Station ha Imphal East distrik.
Une u briew u dei uba la tip kyrteng kum u Thokchom Jotilal Singh (29) ba la tip ruh da ka kyrteng kum u Anggamba. Ha kane ka jingkem na u la ïoh kurup ïa kawei ka Mobile Phone.
Ki heh sorkar ki la ïathuh ba baroh ki briew kiba la shah kem la rah sha phatok ban tohkit bniah, bad ki jingtohkit jong ka aiñ ki dang ïaid shakhmat.
Ki bor pahara ki la pynpaw biang ïa ka jingkular jong ki ban pynneh ïa ka suk ka saiñ bad ban bteng ïa ki kam pyrshah ïa ki kam beaiñ ha kylleng ka jylla.
ïa mynta ka jingpahara ka dang long ha baroh ki bynta jong ka jylla khnang ban khanglad ïa ki riewshim kabu ban leh ïa ki kam pyntriem.
