Shillong, Nohprah 17
Ka Meghalaya Football Association (MFA) ha ka sngi Balang ka la pynbna ïa ki kyrteng ki rangïalehkai ki ban mihkhmat ïa ka jylla ha ka lympung ïaknieh (qualifying round) jong ka Senior Men’s National Football Championship na ka bynta ka Santosh Trophy 2025-26.
Ha kane ka kynti kaba mynta, ka MFA ka la pynbna ruh ba ka la jied ïa u Hardy Cliff Nongbri kumu kapten bad u Bah Khlaiñ Pyrkhat Syiemlieh kum u coach.
Ha kane ka lympung, ka Meghalaya ka la don ha ka Group-E ka ban long ha nongbah Shillong, ha kaba kan ïakhun nyngkong pyrshah ïa ka Sikkim ha ka sngi Thohdieng (19 tarik) bad ïa ka Arunachal Pradesh ha ka 23 tarik mynta u bnai.
Ïa kine ki jingïalehkai yn pynlong ha SSA Stadium, First Ground, Polo ha ka por 4 baje janmiet, ha kaba ki tiket na bynta kane ka jingïakhun yn die paidbah ha ki sngi ba don ki jingïalehkai.
Haba ïakren bad ki nongthoh khubor, u Hardy Cliff Nongbri u la pynpaw ba kane ka long ka burom kaba khraw ha ka jingim jong u ban shah jied kum u kaptenjong ka kynhun, ha kaba u la bynrap ba kum ka kynhun, mynta ka kynti ka don ïa ki rangïalehkai ba kynsai ryngkat u coach uba tbit.
Katba na ka liang u Bah Khlaiñ Pyrkhat u la ong ba ka jingjied ïa u Hardy kum u kapten ki long ki nongmuna kiba la paka palat ban jied ïa u kum u nongïalam namar lyngba ka jinglah ban pynpaw jingtbit ka jong u na ka bynta ka kynhun ïalehkai ka Nongkseh SS&CC.
Watla ka MFA ka la ïoh por thmit palat ban pynkhreh ïa ka kynhun, hynrei na ka liang u Bah Khlaiñ u la pynpaw ba u don ka jingshaniah ha ki rangïalehkai ba kin lah ban ïalehkai bha ha kane ka lympung.
