Khliehriat, Nohprah 17
Ka Byndihati SC bad Dkhiah West SC ki la rung sha ka phainal jong ka lympung ïalehkai Women’s Football Tournament ba la pynïaid da ka East Jaiñtia Hills District Football Association.
Kane kala wan hadien ba ka Byndihati SC bad ka Dkhiah West SC ki la khur jingjop ha ka semi final kaba la long ha ka sngi Balang ha madan artificial turf Dien-shynrum, Khliehriat.
Ha ka jingïakhun semi final kaba nyngkong, ka Dkhiah West SC ka la pynliem noh ïa ka Umshong SC da 7-0 kol. Ka Nisilia Majaw ka la khyrwit da ar tylli ki hat-trick ha ka minit 20, 30, 44, 58, 66 bad 80+2, katba ïa kawei pat la thep da ka Rushia Dkhar ha ka minit ba 51.
Haba phai sha kawei pat ka jingïakhun kaba ar, ka Byndihati SC ka la jop haduh 11-0 kol ïa ka Jalyiah United SC. Ka Ïaphisha Marbaniang ka la khur ïa ka hat-trick hadien ba ka la thep ha ka minit 34, 37 & 35. Katba ïa kiwei pat ki kol la thep da ka Hapily Lyngdoh (7 & 36), Makrisha Songthiang (14 & 29), Phyrnai nongtdu (16), Feliua Sympli (25) bad ka Charlinda Nongtdu (39 & 40).
Te kumta ka Byndihati bad ka Dkhiah West kin pynkhreh ban ïaknieh ïa ka nam lahduh ha ka phainal ka ban long ha ka sngi Saitjaiñ (20 tarik) ha ka por 1 baje nohphai sngi.
