Shillong, Nohprah 18
U Myntri Rangbah ka Jylla, Conrad K Sangma ryngkat lang bad u Symbud Myntri Rangbah ba khmih ïa ka tnad Kam Pohïing, Bah Prestone Tynsong, kila ïakynduh ïa u Myntri ka tnat Kam Pohïing ka Sorkar Kmie u Amit Shah ha Delhi, bad kyrpad ïa ka Sorkar Kmie ba kan mynjur noh ha ka ban pyntreikam ïa ka Inner Line Permit (ILP) ha Meghalaya.
Na ka liang jong u Conrad bad u Bah Prestone kila pynpaw hakhmat u Amit Shah ba ka jingpyntreikam ïa ka ILP ka dei ka jingangnud kaba la slem jong u paidbah bad kala ïaid hynriew snem ka jingap ïa ka Sorkar Pdeng naduh ba ka Jylla, kala mynjur ïa ka resolution hapoh ka ïingdorbar thawaiñ ban pyntreikam noh ïa ka ILP.
“Ngi la ïakynduh ïa u Amit Shah ha ka 14 tarik Nohprah ha Delhi bad ngi la ïakren sani bha halor ka jingdawa pyntreikam ïa ka ILP,” ong u Bah Prestone haba ïakren bad u nongthoh khubor.
U la pyntip ba ha kane ka jingïakynduh la ïakren ruh halor ka jingai jingmynjur ban pynrung ïa ka ktien Khasi bad Garo ha ka khyrnit ba phra jong ka riti synshar ka ri, ban ai noh ïa la ka jong ka Civil Service Cadre ïa ka Meghalaya bad ka Foreigners & Immigration Act, 2025.
U Bah Prestone u la ong ba ka Foreigners & Immigration Act ka dei kaba kongsan bha ha ka Jylla khamtam haba sakhi ïa ki jinglong jingman ha ri Bangladesh. “Ka jingïadei hapdeng ka ri India bad ka Bangladesh kam long kaba itynnad bad ngi hap ban shimkhia bha ïa ki lad jingïada khnang ban lah khang ïa ka jingwan rung tuh ki mynder ri, la ki dei kiba wan lyngba ka Assam ne na kylleng sawdong ki khappud,” u la ong.
Halor ka ILP, u Bah Prestone u pyntip ba u Amit Shah u la ïathuh ba ka Ministry of Home Affairs (MHA) ka dang khmih bniah ïa kane ka kam bad kumjuh ruh ïa ka jingpynrung ïa ka ktien Khasi bad Garo ha ka khyrnit kaba phra.
“U Amit Shah u la pyntip ba ka MHA ka dang khmih bniah ïa ka jingdawa ILP bad pynpaw ba ha ka por kaba biang, ngin sa pyntip sha phi ïa ka jinglah pyntreikam ïa ka,” ïathuh u Bah Prestone haba pyntip ba ka Sorkar ka khlem shongthait ban buddien ïa ka jingdawa ILP bad ka Ktien Khasi bad Garo naduh ba ka ïingdorbar thawaiñ kala ai jingmynjur ïa ka resolution.
“Ngi don jingkyrmen ba ha kawei ka sngi, ka Sorkar Pdeng kan sa pynmih ïa ka ‘Draft’ ka ban pynthikna ba ki nongshong shnong ka Meghalaya kin long kiba shngaiñ bad yn ym don mano-mano ruh ki ban ïoh rung ne sah hapoh ka Jylla khlem da shah khmih bniah shuwa,” u la bynrap.
Haba kylli ïa ka jingbym kren shai ka Sorkar Pdeng la kan ai ne ym ai ïa ka ILP, u Bah Prestone u la ong, “Kaba ngi hi, ngi ïakren ka long tang katne, sngewbha burom lem ïa ka jingangnud jong ki paidbah ka Meghalaya”.
U Bah Prestone u la pynpaw ïa ka jingsngewtynnad ba tang hadien ba dep ïakynduh ka Sorkar Jylla ïa u Amit shah, u MP ka Lok Sabha na Shillong, Dr. Ricky Syngkon, u la leit ïakynduh ïa Amit Shah ban dawa ILP.
