Shillong, Nohprah 18
U dkhot ka seng Congress, u Jose K Mani, u la rah ïa ka mat jong ka phutbol ka India ha Rajya Sabha ha ka sngi Palei, da kaba ïanujor ïa ka jingeh jong ka India bad ka jingïoh rung jong ka Curacao ka ri kaba rit sha ka World Cup da kaba buh jingkylli ïa u myntri ka tnat ïalehkai, u Mansukh Mandaviya, halor ki jingthmu ban kyntiew ïa kane ka jingïalehkai ha India, kaba mynta ka dangdon hapdeng ka jingeh kaba khraw kynthup ïa ka jingpynsangeh ïa ki lympung ïalehkai hapoh ka ri.
U Mani, uba mihkhmat ïa ka Kerala, u la pynpaw ba kumno ka Curacao, kaba don tang 1,58,000 ngut ka jingbun briew bad ka jaka kaba don hapoh 450km, ka la ïoh ban rung sha ka FIFA World Cup jong u snem ban wan lyngba ka CONCACAF, katba ka India wat hapdeng ka jingbun paid, ka dangïai bteng ban ïakynduh jingeh.
“Ka jingïaknieh rung jong ka FIFA World Cup ka long katkum ki kyndon ba la buh da ka FIFA,” la jubab u Mandaviya ïa ki jingkylli jong u Mani.
“Ka jingkitkhlieh na ka bynta ban kyntiew ïa kano kano ka jingïalehkai kynthup ban shim ïa ki sienjam na ka bynta ban ïashim bynta ha ka World Cup/World Championships ka dei jong ka synjuk ïalehkai National Sports Federation (NSF).Ka All India Football Federation (AIFF) ka la ïoh ka jingithuh lyngba ka tnat kum ka NSF na ka bynta ban kyntiew ïa ka jingïalehkai phutbol ha ka ri. Ka AIFF ka la pyntip ba ka long ka jingïaid lynti kaba jngai ban pynurlong ïa ka India ban ïoh rung sha ka FIFA World Cup, da kaba pynleit jingmut ïa ki kynhun ïalehkai jong ki kynthei bad shynrang jong ka ri,” u la bynrap.
Ka AIFF hapoh ka jingïalam da u Kalyan Chaubey, ka la ïakynduh ïa ka jingeh kaba khraw na ka bynta ban pynskhem ïa ki nongbei tyngka ha ki lympung ïalehkai hapoh ka ri, kiba la shah pynsangeh noh. Kane ka jinglong jingman ka la pynlong ïa ka Supreme Court ban tuklar hadien ka jingshah kynthoh ki bor pynïaid jong ka synjuk.
U Mandaviya u la kdew ïa ki jingthmu ban kyntiew ha ka liang ka youth development jong ka AIFF, da kaba kdew ïa ka jingseng ïa ki shlem ai jinghikai jong ka FIFA-AIFF ha Bhubaneswar bad Hyderabad na ka bynta ki khynnah shynrang kiba hapoh 13 snem bad ki khynnah kynthei kiba hapoh 14 snem.
“Nalor kata, lyngba ka Khelo India Asmita League, ka AIFF ka la pynlong ïa ki jingïalehkai phutbol jong ki khynnah kynthei, da kaba pynlong ïa ki 87 tylli ki lympung bad 68 tylli ki lympung ha kylleng ka ri, ha ka samoi ïalehkai 2023-24 bad 2024-25, kawei hadien kawei pat,” la bynrap u Mandaviya.
