Guwahati, Nohprah:
Ki la don kumba 15 ngut ki briew kiba la shah pynshisha ba ki dei ki nong Bangladesh kin shah beh na India. Ka jingbeh la pynïadei bad ki BSF, kan jia ha khappud jong ka pyrthei. Ki briew ba la set ha Matia Detention Camp katba dang ap ïa ka por ba kin shah pynphai. .
Ka Nagaon Foreigners’ Tribunal ka la pynbna ïa ki 15 ngut ki briew kum ki bar jylla kiba wan na Bangladesh bad ka la hukum ban beh noh ïa ki na India hapoh 24 kynta.
Da kaba leh katkum ka jingbthah jong ka Tribunal, ki pulit ki la shim ïa kitei ki briew sha phatok ban beh noh ïa ki. Ïa ka hukum pynphai ba pura la pynmih da u Devashish Sharma, Commissioner District jong ka Nagaon, katkum ka jinglap jong ka Tribunal.
Ki heh sorkar ki la ïathuh ba ïa ki bar jylla ba la ithuh la pynsah ha ka Matia Detention Camp bad dang pyndep ïa ki kyndon aiñ bad ki kyndon synshar ba donkam. La khmih lynti ba ki shipai pahara khappud (BSF) kin aiti ïa ki sha Bangladesh lyngba u International Border ha ka por miet hadien ka jingai rai.
Ki bor synshar ki la pynpaw ba ïa kane ka jingpyntreikam la leh hadien ka jingpynkhreh pyntreikam katkum ka aiñ kaba biang, da kaba pynpaw biang ïa ka jingkular jong ka sorkar ban pyntreikam ïa ki aiñ ïa ki nongwan buhai shnong bad ki rai jong ka ïingbishar.
Kine ki briew kiba la shah pynshisha ba ki dei ki nong Balangdesh ki dei kiba la tip kyrteng kum u Johura Khatun, No. 1 Kandhulimari, Dhing, Abdul Aziz, Hedayatnagar, Nagaon Town, Aheda Khatun, Bagariguri, Juria, Azufa Khatun, Garemati Khowa, Rupohihat, Hussain Ali, Dighaliati, Raha, Fazila Khatun, Hatiyujowa, Batadrava, Anura Begum, Lengteng, Samaguri, Asha Khatun, Shalbari, Samaguri, Nazrul Islama, Chaparmukh Town, Raha, Rahim Sheikh, Dighaliati, Raha, Burek Ali, Dighaliati, Raha, Idris Ali, Raha Town, Rustam Ali, Hatigaon Bagan, Kaliabor, Anwar Khan, Garubandha, Jakhalabandha bad u Taher Ali, Goraimari, Kaliabor
Ki heh sorkar ki la pynthikna ba ïa ka jingpynphai yn pynlong hapoh ka jingpahara kaba pyrkhing bha bad ha ka jingïatreilang bad ki bor ba dei khmih ha ki jaka khappud.
