Shillong, Nohprah 18
Ka Meghalaya kan sdang ïa ka jingïakhun pyrshah ïa ka Sikkim ha ka Group-E jong ka lympung ïalehkai Senior Men’s National Football Championship na ka bynta ka Santosh Trophy 2025-26 (preliminary round) ha ka sngi Thohdieng ha SSA Stadium kaba ha First Ground, Polo ha ka por 4 baje janmiet.
Kane ka jingïakhun ka long kaba kongsan bha ïa ka Meghalaya namar tang kawei ka kynhun napdeng ki lai tylli lem bad ka Arunachal Pradesh ki ban ïoh rung sha ka wat kaba khatduh ka ban long ha u Kyllalyngkot ha Assam. Ïa ki tiket yn die ha katei ka jaka hashwa ban sdang ka jingïalehkai.
Hapdeng ka jingbun ki rangïalehkai, hynrei la lah ban jied ïa ki rangïalehkai ba kynsai da u coach u Bah Khlaiñ Pyrkhat Syiemlieh. Dei hapoh ka jingïalam jong u ba ka Meghalaya ka la shah rem noh ha ka Santosh Trophy 2022-23 ha ka Karnataka.
Kumba ka long mynta kane ka kynhun ka la long kaba kham pher na kaba long ha u snem ba la lah bad kane ka long kumjuh ïa ka Sikkim.
Ki ar tylli ki jylla ki la ïakynduh bunsien ha la ki jong ki kyrdan ïalehkai phutbol jong ki shynrang bad kynthei. Ha ka Santosh Trophy, ka jingïakynduh ba khatduh jong ki ka long ha ka aïom ïalehkai ba kyrpang jong ka Meghalaya 2022-23. Watla ka Meghalaya ka la pynliem ïa ki kynhun kiba kham paw, hynrei pyrshah ïa ka Sikkim ki la ïakhaid khlem lah ban thep kol.
Kumba long u Bah Syiemlieh, ka Sikkim ka don ruh ïa u coach u Gyaltshen D Moktan, uba la bat ïa ka kyrdan AFC B License. Ki katto katne ki rangïalehkai kiba don ha kane ka kynhun ki kynthup ïa u Sanjay Rai, uba dei u rangïalehkai u la don bynta ha ka ATK (Mohun Bagan Super Giant) bad u Narayan Chettri, uba dei u rangïalehkai barim ka Kerala Blasters. Kiba bun na ki rangïalehkai ki dei kiba ïalehkai ha ka A bad B Division jong ka Sikkim, katba katto katne ki dei ki ïalehkai sha kiwei pat ki jylla.
Ha ka sngi jong ka sngi Palei, kane ka kynhun ïalehkai ka Jylla ka la ïoh ïa ki kyntien kyntu kynphan na u President ka Meghalaya Football Association u Bah Hamletson Dohling, kumjuh u General Secretary Bah Sunesh Syiem bad u Executive Member Bah Freddy Kharpran.
U Bah Dohling u la pynpaw ka jingshaniah kaba pura ha ki rangïalehkai kiba la shah jied bad pynkynmaw ba kane ka lympung kan long kaba kongsan ha kaba thaw ïa ka buit treikam bad ka rukom jied ïa ka kynhun ïalehkai ka Jylla Meghalaya na ka bynta ka National Games 2027, ka ban long ha kane ka Jylla.
Ha kajuh ka por u Bah Hamletson u la kular ban ai bai cake Khristmas mar T.5000 sha baroh ki rangïalehkai lada ki lah ban pynurlong ïa ka jingjop ha baroh ar ki jingïakhun jong ka Group-E.
Ki kyrteng ki rangïalehkai
Goalkeeper: Wanteilang Mal-ngiang, Banshanskhem Kharsyn -tiew & Nister Roy Suting
Defender: Wanboklang Lyng -khoi, Apborlang Kurbah, Wilbert D Marbaniang, Iohborlang L Lyng -khoi, Allen Camper L Nongbri, Arlangky Nongsiej & Meban-khraw K Wahlang
Midfielder: Hamedamanbha Wahlang, Riborlang L Lyngkhoi, Babysunday Marngar, Dibormi Kassar, Mebanshngain Kurka-lang, Fairming Suting, Robertson M Khongriah, Hardy Cliff Nongbri & Kynsaibor Lhuid
Forward: Shano Tariang, Deibormame Tongper & Dawan -chwa C Challam
Ki nongïarap ka kynhun ki long u Bah Khlaiñ Pyrkhat Syiemlieh (Head Coach), Sailon Syngkrem (Assistant Coach), Dious Lapasam (Goalkeeping Coach), Bah Cliff R Nongrum (Manager) & Wanbok-star Syiemiong (Physio).
