Shillong, Nohprah 19
U Myntri Rangbah ka Jylla, u Conrad K. Sangma u la pynbna ïa ka rai ba kongsan jong ka Kynhun Myntri ka Jylla ban wanrah ïa ka rukom siew tulop kaba beit ryntih, ka jingpynkiew tulop kaba man u snem, bad ka jingshngaiñ ha ka kam na ka bynta palat 23 hajar ngut ki nonghikai ‘Adhoc’ bad SSA ha ka Jylla.
“Mynta ka sngi, ka Kynhun Myntri ka la shim ïa ka rai kaba kongsan bad ka jingpynkylla kaba khraw haba ïadei bad ka tnad pule-puthi,” ong u Sangma ha ki nongthoh khubor hadien ba pynïaid ïa ka jingïalang ka Kynhun Myntri kaba khatduh jong une u snem ha ka Sngi Thohdieng.
“Ngi la mynjur ïa ka jingtyrwa ban wanrah ïa ka jingsiew kaba beit ryntih na ka bynta ki nonghikai ‘Adhoc’ bad SSA, ha ryngkat bad ka jingpynkiew tulop ba man u snem bad ka jingkyntiew tulop katkum ka jinglong rangbah ha ka kam,” u la ong.
U la bynrap ruh ba la pyntikna ïa ka jingshngaiñ ha ka kam sha kine ki nonghikai, lem bad ki kyndon na ka bynta ban noh synñiang sha ka Contributory Provident Fund (CPF) da baroh ar – ki nonghikai bad ka Sorkar.
“Ïa kane yn pyntreikam naduh ka 1 tarik u Ïaïong, 2026, kumba la kular,” ong u Sangma, da kaba batai ïa kane kum ka “khubor Khristmas kaba bha na ka bynta ki nonghikai jong ngi.”
“Nga pyndep ïa kata ka jingkular ba la ai sha ki nonghikai jong ngi. Bad ha kine ki lai bnai ban wan hadien u snem thymmai, ngin sa trei tikna halor ka rukom pyntreikam, ki rukom pynïaid kam bapher-bapher kiba donkam, bad lyngba kata ka por, ngan sa pyntip ïa phi shaphang ki nombar ba bniah hynrei ïa kine ki nombar la dep ban ïakren bad ki nonghikai SSA bad ki nonghikai ‘Adhoc’ bad dei da kata ka jingmynjur bad jingïakren bad ki mynta ba ngi la wanrah ïa kane ha ka Kynhun Myntri bad ka Kynhun Myntri ka la mynjur ïa ka,” u la bynrap.
Kane ka rai ka kynthup ïa kumba 23 hajar ngut ki nonghikai ‘Adhoc’ bad SSA.
Halor ka jingktah ha ka liang ka pisa-tyngka, u Sangma u la ong ba ka jingktah kan long kaba “khraw bha” hynrei um shym la pynpaw ïa ki jingkheiñ ba bniah.
“Kane ka dei ka jingkylla kaba khraw bad ka rai ka ban pynkylla ïa ka tnad pule puthi,” u la ong, da kaba ai khublei ïa ki nonghikai, u Myntri ka tnad pule-puthi, bad ki ophisar na ka bynta ki jingpyrshang jong ki.
Haba kylli, u Sangma u la ong, “(Kane ka long) ha kawei ka liang – ka dei ka khubor Khristmas kaba bha na ka bynta ki nonghikai jong ngi naba ka dei kaei-kaei kaba ki nonghikai jong ngi ki la dawa la slem bah. Naduh ka por ba nga la rung bad shimti kum u Myntri Rangbah, wat hashuwa jong kata, la bun snem bad ki phew snem, kane ka la long ka jingdawa kaba la slem bah jong ki nonghikai SSA bad ‘Adhoc’ bad nga sngewkmen ba ka Sorkar MDA jong ngi mynta ka sngi ka la shim ïa kane ka rai kaba shlur ban ïaid shakhmat bad kane bad ban wad shi syndon ïa ka lad ka lynti haba ïadei bad kane ka jingeh kaba la ïakren bniah ha kiba bun ki jingïalang bad ki nonghikai.”
