Shillong, Nohprah 19
Ki nongïalam bad ki dkhot ka seng Congress ha ka sngi Thohdieng, ki la leit sha ka ophis treikam jong ka Bharatiya Janata Party (BJP) Meghalaya ban pynpaw ïa ka jingpyrshah ïa ka Sorkar Pdeng halor ka jingthmu pynkylla ïa ka kyrteng jong ka Mahatma?Gandhi National Rural Employment Guarantee Act (MGNREGA).
Haba kren sha ki lad pathai khubor u Secretary ka Meghalaya Pradesh Congress Committee (MPCC) u Bah Manuel Badwar u la ong ba ka jingthmu ban pynkylla ïa ka MGNREGA sha ka ‘G Ram G’ kam dei tang ka jingpynkylla ïa ka kyrteng hynrei kan sa ktah ïa ka hok jong iwei-pa-iwei i nongshong shnong.
“Kane ka aiñ kaba thymmai ka la weng noh ïa ka jingpynthikna ïa ka jingïoh bylla shispah sngi, bad kan pynduh ïa ki lad ai kam katkum ka bor jong ka Sorkar da kaba pynshong nongrim ïa ka jingdon ïa ka pisa,” la ong u Bah Manuel.
U Bah Manuel u la ong ruh ba kane ka jingleh kan ktah jur ïa ki atiar jong ki skhim na ka bynta ka bha ka miat, da kaba pynkylla sha ka atiar saiñ pyrthei ban ïoh pyndonkam da kaba shu ïa jied.
Nalor kata, u ong ba ki shnong ki thaw kin shah ktah jur da kaba pynshong nongrim katkum ka mon jong ka seng kaba lam ïa ka jingsynshar.
“Ki nongshong shnong kiba shisien kiba la thikna ban ïoh kam mynta ki lah ban shem ïalade ba khlem kam khlem jam shuh, ka ban pynmih ïa ka jingeh kaba khraw ïa ki ïing ki sem ki jong ki bad kan pynbor ïa ki longïing ban ngam ha ka jingshim ram” u la ong.
U la pynpaw ba kan don ruh ka jingktah kaba ïar, namar ki khynnah kin hap ban iehnoh ïa ki skul ban leit wad kam, ka bai bylla ha nongkyndong ka lah ban hiar dor namar ka jingbym don ki kam bylla bad ki nongairam ki lah ban shim kabu ïa kiba shem lanot namar ka jingduk.
“Ha Meghalaya, kiba bun ki shaniah ha katei ka skhim 100 sngi bad kane ka lah ban pyndkoh ïa ka ïoh ka kot jong ki longïing longsem,” la bynrap u Bah Manuel.
U Bah Manuel u la khot la wer ïa kiwei pat ki seng saiñ pyrthei ban ïa tylli, da kaba kyntu ban ïa shimbynta lang ha ka jingïakhih.
“Ngi ngim dei ka Jylla kaba riewspah, ka per-capita GDP kadei kaba rit tam hapoh ka ri. Ngi hap ban ïeng ban ïada ïa ki nongshong shnong na kane ka jingshah kput ka Congress bad ïa ki nongrim jong u Mahatma Gandhi,” la bynrap shuh-shuh u Bah Manuel.
