Sydney, Nohprah:
U Naveed Akram, uba dang im ha ka jingshah siat pathar ha ka Sngi U Blei ha Bondi Beach ha Sydney, ula shah pynngat ha ki 59 tylli ki kam runar, ba kynthup ia ki 15 tylli ki kam pyniap briew bad kawei ka kam lehnoh, ong ki pulit jong ka New South Wales.
U kpa jong u, u Sajid Akram, 50 snem ka rta, u la khlad noh ha ka jingiasiat kuli bad ki pulit ha katei ka jaka.
Ki 15 ngut ki briew, ki la iap bad da ki phew ngut kiwei pat, ki la mynsaw, ha katei ka jing thombor, kaba la thombor ia ki jaidbynriew Jew jong ka Australia, ha ka jingialang, kaba rakhe ia ka miet ba nyngkong jong ka Hanukkah.
Ka dei ka jingshah siat kaba shyrkhei tam ha ka ri naduh u snem 1996.
U Akram u mad ruh ia ki 40 tylli ki jingshah kynnoh ba u la pynmynsaw jur ia ka met da kaba thmu ban pyniap briew, kumjuh ruh kawei ka jingshah kynnoh ba u la pynlong ban pyni paidbah ia ka dak jong ka seng lehnoh ba la khang pyrshah.
U la mynsaw jur ha katei ka jingjia ha ka Sngi U Blei, bad u la ioh ia ka jingbishar kaba nyngkong na harud jingthiah jongu ha hospital, la ong ka iingbishar jong ka thain New South Wales.
Ia kane ka mukotduma la pynsangeh noh haduh u bnai Risaw 2026, la bynrap shuh shuh ka iingbishar.
Kham mynshwa ha ka sngi thohdieng, u Commissioner pulit jong ka New South Wales, u Mal Lanyon, u la ong ba ki dang ap ïa ki dawai ba kin jah shwa ban kylli jingkylli thikna ïa u Akram.
“Na ka bynta ka jinglong hok jong u, ngi donkam ia u ban sngewthuh ia kaei kaba jia thikna”, la ong u Lanyon.
Tad haduh ka janmiet jong ka sngi thohdieng ha ka por jong ka ri, ki don 17 ngut kiba dang shah sumar ha ki hospital ha kylleng ka nongbah Sydney. Uwei u don ha ka jingeh kaba khraw, bad saw ngut kiwei pat la batai ba ki don ha ka jingeh hynrei ki dang sngur bha.
Ki pulit, ki la kdew ia katei ka jingshah thombor, kum ka jingjia lehnoh, ha kaba U Anthony Albanese, myntri rangbah duh jong ka Australia, ula ong ba katei ka jingjia, ka i kumba ka dei kaba la pynkhih da ka jingmut jingpyrkhat jong ki kynhun Islamic State.
Ha ka sngi thohdieng, ka la paw ba u kpa bad u khun ki la leit sha Philippines ha u bnai Nohprah.
Ka tnat immigration jong ka Philippines, ka iathuh ki lad pathai khubor, ba ki don ha katei ka Ri, naduh ka 1tarik Nailur haduh ka 28tarik Nailur. Ka jaka ba khatduh jong ki ka dei ka nongbah Davao kaba don shathie, la ong u nongaiktien jong ka tnad wan rung sha ka ri.
U Naveed Akram, u leit sha Philippines, da kaba pyndonkam ia ka passport jong ka Australia, katba u kpa jong u, u Sajid, u pyndonkam ia ka passport jong ka India, ong ki bor pyniaid khappud ha Manila sha ki lad pathai khubor.
U Sajid Akram, u dei uba wan na ka nongbah Hyderabad, kaba don shatei lam mihngi jong ka India, hynrei, u don “ka jingïadei kaba rit” bad kiba haïing jongu hangtei, ong uwei u heh pulit na ka jylla Telangana jong ka ri India.
Napdeng kiba la shah pyniap ha katei ka jingshah thombor, ki don arngut ki Rabbi, kawei kaba la lait im na ka Holocaust bad kawei ka khynnah kynthei kaba dang 10 snem ka rta, kaba la ai kyrteng da kiba ha iing jong ka kum ka Matilda.
U Boris bad ka Sofia Gurman, ki shijur kiba la shah ring dur ha ka por ba ki ialeh pyrshah bad uwei na ki nongrah suloi ha ki por ba dang sdang jong katei ka jingshah thombor, ki dei ruh napdeng kiba la shah pyniap.
Sa 27 ngut ki briew ki la shah pynkit sha hospital namar ka jingmynsaw, kynthup ia arngut ki pulit.
Uwei na ki ophisar, uba la tip kyrteng kum u Jack Hibbert, uba 22 snem ka rta, ula duh noh ia ka jingpeit ha kawei ka khmat bad u iakynduh ia ka “jingkoit kaba jrong bad kaba eh”, la ong ka iing ka sem jongu ha ka kyrwoh.
Kham mynshwa ha katei ka sngi, da ki hajar ngut, ki la ialum lang ban sngewlem ia U Rabbi Eli Schlanger, uba la kha ha Bilat, ha ka jingleit ontep kaba nyngkong, kaban sa pynlong ia kiba la shah shoh ha katei ka jingshah siat.
U Myntri Rangbahduh ka ri u Anthony Albanese um shym la don ha kane ka sngi. Haba kylli ha ka lad pathai ABC News Radio shaphang ka jingbym don jong u, u la ong: “Ngan leit sha kano kano ka jingïalang kaba la khot ïa nga. Kine ki dei ki jingleit ontep kiba dang ïaid ban ïakynduh ïa kiba ieid jong ki briew.”
Ka jaidbynriew Jiw ka la kynthoh ïa u Albanese namar ba um shym la shim khia bha halor ka jingïaleh pyrshah ïa ki Jiw – u la ïada ïalade na kita ki jingkynnoh, da kaba ïathuh ha ka ABC NewsRadio ba u la shim ïa ki lad ki lynti kiba bun kynthup ïa ka jingthung ïa u nongmihkhmat pyrshah ïa ki Jiw ba nyngkong eh jong ka ri, ban pynkhlain ïa ki aiñ pyrshah ïa ki Jiw bad ban pynbun ïa ka jingai pisa na ka bynta ki projek bad ka jingïatylli ha ka imlang sahlang jong ki Jiw.
Haba kren ha ka jingleit ontep ia u Rabbi Schlanger, u Rabbi Levi Wolff u la batai ia ka jingiap jong u kum ka “jingduh kaba ym lah ban ong” na ka bynta ka imlang sahlang.
“U Eli u la shah rong noh na ngi, u da leh ia kaei kaba u ieit eh,” u la ong.
“Da kaba pynphriang ia ka jingieit bad jingkmen bad sumar ia la ki briew da ka jingaiti lut kaba khlem kut ha ka jingim jong u bad ha ka jingiap jong u, u la kiew sha jrong kum uwei na ki mynsiem kiba ha khlieh duh bad kiba khuid tam.”
U Rabbi Schlanger u la iarap ban pynlong ia ka jinglehniam Hanukkah jong ka Sngi U Blei.
Ka jingleit ontep ia kiwei pat ki nongshah pyniap, la khmih lynti ba kan jia ha kine ki sngi ban wan, kynthup ia ka nongtep kaba rit tam, ka Matilda, ha ka sngi Thohdieng.
