Shillong, Nohprah 21
Ka Arunachal Pradesh ka la pynliem noh ïa ka Sikkim da 1-0 kol ha ka jingïalehkai jong ka Group-E ha ka Senior Men’s National Football Championship na ka bynta ka Santosh Trophy 2025-26 (preliminary round) ha ka sngi U Blei ha SSA Stadium kaba ha First Ground, Polo.
Kane ka jingshah rem noh ka Sikkim ka la long ka jingkyrmen ïa ka Megha-laya, kaba la mad ïa ka jingshah rem ha ka jingïalehkai ba nyngkong. Te kumta kane ka kynhun hapoh ka jingïalam u Bah Khlaiñ Pyrkhat Syiemlieh ka donkam ban ïakhun tyngeh ban khur jingjop ha ka jingïalehkai kaba khatduh pyrshah ïa ka Arunachal ka ban long ha ka 23 tarik na ka bynta ban pynthikna ban ïoh rung sha ka wat kaba khatduh.
Haba phai sha katei ka jingïalehkai ka la long kaba ïakhaid bha ha kaba baroh ar ki kynhun ki la pyrshang ban ïakhun tyngeh, ha kaba ym shym la don ba lah ban thep kol ha ka kylla step. Dei hadien ba la bteng ïa ka jingïakhun jong ka kylla miet ba ka Arunachal ka la ïoh ïa ka kabu kaba biang ban pynkhih jar ha ka minit kab 57 lyngba u Rinchin Dorjee Karma bad haduh kaba kut kane ka kynhun ka la lah ban khur syndon ïa ka jingjop.
Kumba ka long mynta ka Arunachal bad ka Sikkim ki la kamai mar 3 point, hynrei ka Arunachal ka donkam tang 1 point na ka Meghalaya ha ka jingïalehkai ba khatduh ka ban long ha ka sngi Ba-ar, katba ka Meghalaya ka donkam ïa ki 3 poiñ.
Ka jingjop na ka bynta ka Meghalaya kan pynlong ïa baroh lai tylli ki kynhun ban kamai mar 3 poiñ bad ka jingïapher ha ka jingthep kol kan shong ha ka jingïakhun. Ban jop tang 1-0 kol kam pat biang ïa ka Meghalaya namar ka donkam ban thep 2 kol shaneng na ka bynta ban pynthikna ban ïoh rung na ka Group-E sha ka wat ba khatduh.
