Itanagar, Nohprah:
Ki pulit ki la kem ïa u trai jong ka Mini-truck uba long ka daw jong ka jingjia aksiden ha Anjaw distrik jong ka Arunachal Pradesh kaba la pynïap ïa 20 ngut ki nongtrei, kaba la pyni ïa ka jingkylla kaba khraw ha ka mukotduma kaba la buh ïa ki jingkylli kiba jur halor ka jingkit jingbah beaiñ bad ka jingpynkheiñ ïa ka kyndon ban buh jingshngaiñ.
Une uba shah kynnoh, u dei uba la tip kyrteng kum u Bhushan Kumar Yadav, 36 snem ka rta, u la shah kem na Chapra ha Bihar, hadien ba la kynnoh ba u la phet rieh hadien ka jinghap kane ka trok.
Ka kali kaba u don, ka la ngam shapoh ka thliew kaba jylliew ha ka thaiñ ba shaphang Mihngi jong ka Arunachal Pradesh, ha kaba ki la ïap jan baroh kiba don ha kane ka kali.
Ki heh sorkar ki la ïathuh ba u Yadav u la shah mudui namar ka jingbym shimkhia bad ka jingpynkheiñ bunsien ïa ki aiñ kali, namar ba la khang ban kit ïa ki nongleit nongwan ha ka kali kit mar.
Da ka jingshah kem jong u, ka jingdon jong ki briew kiba shah set ha katei ka mukotduma, ka la kiew sha ka lai ngut. Shwa ïa kane, ki pulit ki la kem ïa arngut kiwei pat kiba shah kynnoh halor ki jingkynnoh ba ïadei bad ka jingkhaïi briew bad ka jingbym shimkhia.
Kane ka jingjia aksiden ka la jia ha ka miet jong ka 8 tarik u Nohprah ha ka surok Hayuliang-Chaglagam ha Anjaw distrik. Kane ka Mini-truck, ka dei kaba kit ïa ki nongbylla na Assam’s Tinsukia distrik, ha kaba ka la ïaid lait na surok bad ka la hap ha kawei ka kshaid kaba jrong bha hajan Lailiang, kaba jngai kumba 40 kilomitar na ka Sub-division jong ka Hayuliang.
Katei ka jingjia ba sngewsih ka la paw pyrthei hadien ar sngi haba uwei u briew uba lait im marwei, u Budheswar Deep, u la poi ha kawei ka jaka treikam jong ka Border Roads Task Force, hadien ba u la ïaid kjat lyngba ki jaka kiba khohruh khohram haduh kumba ar sngi kynthih.
U la pyntip sha ki bor synshar, kaba la pynlong ïa ka jingwad bad jingpyllait im kaba jur bha.
Ka jingpyrshang kaba ïatreilang kaba la ïadon bynta lang bad ki National Disaster Response Force, ki India Army, ki Border Roads Task Force, ki pulit ka thaiñ bad ka bor pynïaid distrik la sdang ha ka 11 tarik u Nohprah.
U Deputy Commissioner ka Anjaw, u Millo Kojin, u la pynthikna ba ïa ka jingkhynra la pyndep ha ka por 10 baje mynstep jong ka 15 tarik u Nohprah.
Ki khubor ba nyngkong ki la pynpaw ba ki don shuh shuh ki briew kiba don ha katei ka kali, hynrei hadien ki pulit ki la pynthikna ba ki don 21 ngut ki briew, kynthup ïa u nongñiah kali, kiba ïaid ha katei ka kali.
Une uba la lait im u dang shah sumar mynta ha Tinsukia, Assam. Ki bor pynïaid ki la ïathuh ba baroh ki met ïap la aiti sha ki longïing hadien ba la pyndep ïa ki kyndon aiñ, bad la pyllait noh ïa ka kynhun NDRF na ka kam.
Ka bor synshar distrik ka la pynpaw ka jingsngewlem sha kitei ki longïing kiba la duh noh bad ong ba ka jingtohkit ka dang ïaid shakhmat ban pynthikna ïa ka jingkitkhlieh bad ban ïada na ki jingjia kiba kum kine ha ki por ban wan.
