Shillong, Nohprah 21
Ka shnong Ladmawreng hadien ba ka la pynlong ïa ka jingpynkhuid shnong ha ka 20 tarik mynta u bnai, ka la buh ka jingkyntu sha baroh ki paidbah ba kin ym dei ban bret pathar ïa ki bilor ne plastic jingbam ha ki rud surok ne ki nala.
U Rangbah Shnong jong ka shnong Ladmawreng u Bah Craftmando Kurbah u la kyntu ïa ki paidbah ba kin ym bret pathar ïa ki plastic jingbam ne ki bilor um ha madan madiah ne ha ki nala, bad ong ba na ki kali ruh haba ki ïeng ha ki surok bah ne surok shnong haba ki la dep bam dep dih ki ju bret ïa ki bilor ne ki plastic sha ki rurok ne lynti syngkien, kumta u la kyntu ïa baroh ki paidbah kin ym dei ban bret ïa ki plastic kwai plastic chips ne ïa ki bilor sha madan ne surok haba ki la dep pyndonkam.
U la ong ba ym dei ban pynlong dustbin ne jaka theh ñiut ïa ka surok ne ïa ki nala shnong ne surok bah bad ong haba la dep ban pyndonkam dei ban rah ïa ki ne bret ha jaka ba dei ban bret.
Ka Executive Committee Shnong Ladmawreng ka la ai khublei kyrpang ïa baroh ki nongshong shnong kiba la don bynta ha kane ka sngi naduh ki longkmie longkpa, khynnah samla kynthei bad shynrang, ïa ki hep ki barit bad kumjuh ruh ïa ki nongshong dukan ha shnong Ladmawreng kiba na marjan shnong kiba la trei shitrhem ban pynkhuid ïa ka shnong.
