Jowai, Nohprah 22
Ka bor pynïaid district ka West Jaiñtia Hills ka la bthah ïa ka West Jaiñtia District Sports Associa-tion (WJDSA) ba kan pynsangeh ïa ka jingïa-lehkai final jong ka 17th U Kiang Nangbah Memorial Trophy Super Division Football Tournament 2025 tad haduh ban da pynmih hukum da kumwei pat, da kaba kdew ïa ka jingbym kohnguh ïa ka jingbthah ba la pynmih kham hashwa.
Ïa kane ka jingïakhun la thmu ban pynlong mynta ka sngi Ba-ar (23 tarik) hapdeng ka Khimusniang bad ka Ladthadlaboh.
Ha ka hukum ba la pynmih ha ka 19 tarik u Nohprah, ka shlem trei-kam u Deputy Commis -sioner ka la ong ba katei ka jingbthah ka la wan hadien ka jingïalang kaba la long ha ka 17 tarik u Nohprah hapoh ka jing-khmih jong ki bor pynïaid district, ha kaba la pynmih ïa ka rai bad ki jingbthah ha kaba ïadei bad ka jingmih ka huri hura na ka jingïakhun semi final jong ka Super Division kaba la don bynta bad ka Demthring SC.
Kane ka hukum ka la pynpaw shai ba ka jingkhang pyrshah ban pynlong ïa ka jingïalehkai final kan dang treikam tad haduh ban da bud pura ïa ka jingshim rai jong ki bor district kaba mih na ka jingïalang kaba la long ha ka 17 tarik u Nohprah bad haduh ban da pynbna da kumwei pat.
Kano kano ka jingpynkheiñ ïa kane ka hukum, la ong ba ka bor district kan shim da ki sien jam katkum ka aiñ.
Ïa kane ka jingbthah la pynmih na ka bynta ka jingmyntoi jong ka rukom pynïaid kaba biang bad kaba bud ryntih, bad la phah kopi ruh sha ki nongïalam ka WJDSA bad sha ka Demthring Sports Club ba kin bud ryntih ïa kane ka jingbthah.
Ka bor district ka la buh ruh ha ka rekod ïa ka jingbishar bniah jong ka ïa ka jingai jingmut ba la ai da ka Demthring Sports Club ha ka 16 tarik u Nohprah, kaba tynjuh ïa ka jingshah sospon jong ki hynñiew ngut ki rangïaleh-kai bad lai ngut ki bor pynïaid jong ka WJDSA hadien ka jingmih jong ka huri hura ha ka por ka jingïalehkai pyrshah ïa ka Khimusniang Sports Club ha ka 5 tarik u Nohprah.
Katkum ka jingpynpaw, ka Demthring ka la kynnoh ba ka jingshah sospon ka long kaba be-aiñ bad ka bym ïahap bad kaba la pynjari khlem da buh ïa ki kyndon kiba dei. Ka klob ka la pynskhem ba katba ki rangïalehkai ki la pynpaw ka jingpyrshah ïa ki katto katne ki rai jong ki rephri ha ka por jong ka jingïalehkai, hynrei ka jingïalehkai ka la bteng khlem kano kano ka jing-thut bad kut ha ka jingïaid beit ïaid ryntih.
Ka bor district ka la kdew ba ïa ka jingïakhih pyrshah hadien ka jingïalehkai la kynnoh ba la pynlong da ki paidbah nongpeitkai, bad ba kam shym la don ïa kino kino ki sakhi kiba kongsan ban pynshisha ïa ka jingdonkti, ka jingpynshit ne ka jingpynshlur na ka liang ki rangïalehkai ne ki bor pynïaid jong ka Demthring Sports Club. Nalor kata, la kdew ruh ba ka la don ka jingbyrthen ïa ki rephri, hynrei khlem da pynngat kyrpang ïa ka jingkitkhlieh.
Ki jingsngewkhia ba kongsan ba la pynpaw da ki bor district ki long ba hadien ka jingbishar bniah, ka la pynpaw ïa ki katto katne ki jingeh halor ka jingshim ïa ki lad jingpynshitom da ka WJDSA:
Ka jingbym don ka jingtohkit kaba bniah, ka jingpynjari ïa ka jingshah sospon khlem da pynshisha ïa ki bynta ne jingkitkhlieh jong uwei pa uwei.
Ka jingpynkheiñ ïa ka nongrim jong ka hok kaba dei ban long, namar ym shym la ai ka jingmudui ban pyni ïa ka daw bad ym shym la ailad ban bishar.
Ka jingbym don ka hukum kaba don jingmut bad kaba shu kren, kaba pynlong ïa ka jingpynsangeh ka bym shong nongrim. Ka jingpynshitom lang kaba la pynjari khlem da pynshong nongrim kyrpang ïa ki briew. Ka jingpynshitom ka bym ïahap, wat lada shim da don kano kano ka jingbakla kaba la jia.
Ka bor district ka la khmih ruh ba ïa ka bor pynshitom kaba don ha ka WJDSA katkum ki riti pynïaid kam jong ka, hynrei ym lah ban shu pyndonkam beit beit kumto, hynrei ki dei ban bud pyrkhing ïa ki rukom treikam bad ki lad jingïada ba la buh.
Halor kine ki jingshem, ka bor district ka la pynmih ïa ka hukum pynsangeh ha ka 10 tarik Nohprah yn dang bishar bniah, lane ban pynkylla bad aijingmut ïa ka WJD-SA ban pynlong ïa ka jingtohkit kaba khuid, ba shai bad bym shah liang.
Katba dangap ban pyndep ïa kum kane ka jingpynbeit, ka bor district ka shim ba ki rangïalehkai ba shah sospon ki dei ban ïoh lad ban ïashim bynta ha ki kam ïalehkai na ka bynta.
Nalor kata ka bor district ka la pynksan shuh shuh ba ki riti treikam jong ki synjuk ïalehkai ki long ban kyntiew ïa ka jing -long ryntih lyngba ka rukom treikam kaba dei bad ban pynneh ïa ka mynsiem ïalehkai, bad ym ban long kum ki atiar ban pynshitom ne pynbor.
Kano kano ka jingïaid lait na kine ki nongrim ka maham ba ka lah ban pynduh ïa ka jingshaniah ha ka rukom pynïaid ha ki rukom treikam jong ka synjuk.
