Shillong, Nohprah 22
Ki paidbah nongkyrshan ka kynhun ïalehkai ka Jylla ki la khmih lynti ban ïohi ïa ka jingjop pyrshah ïa ka Arunachal Pradesh ha ka jingïalehkai kaba khatduh jong ka Group-E ha ka Senior Men’s National Football Championship na ka bynta ka Santosh Trophy 2025-26, mynta ka sngi Ba-ar.
Kane ka jingïalehkai kan long ha ka por 4 baje nohphai sngi bad yn die ïa ki tiket ha katei ka jaka.
Kumba ka paw, ka Meghalaya mynta ka don shatrai eh jong kane ka group bad ka don jingkyrmen ban jam sha ka kyrdan ba hakhlieh lada ka lah ban khur ïa ka jingjop. Lah ban kdew ba tang kawei ka kynhun kaba la lah ban jam sha ka wat ba khatduh (final round), te kumta ka Meghalaya kan hap ban ïakhun dohïap ban khur jingjop.
Lah ban pynkynmaw ha ka sngi U Blei ka Arunachal ka la pynliem noh ïa ka Sikkim da 1-0 kol bad kane ka la wan hadien ar sngi ba ka Sikkim ka la jop ïa ka Meghalaya da 2-1 kol. Lada ka Meghalaya ka lah ban khur jingjop kan pynlong ïa baroh lai tylli ki kynhun ban kamai mar 3 point bad kan don ka jingïapher ha ka jingthep kol. Ban jop tang 1-0 kol kam pat long kaba biang ïa ka Meghalaya namar ka donkam ban thep la kumno kumno 2-0 kol shaneng khnang ban pynthikna ban jam sha kawei pat ka wat jingïakhun na ka Group-E. Katba ka Arunachal pat ka donkam tang ban shu pynïakhaid na ka bynta ban ïoh lamkhmat na kane ka group.
Watla kam shym la don bynta ha ka sngi U Blei, hynrei ka Meghalaya ka la phai la ki khmat sha ka jingïakhun hapdeng ka Sikkim bad ka Arunachal namar ka la khmih lynti ba ka Arunachal kan khur jingjop bad ka la urlong shisha hadien ba u Rinchin D Karma u la ïoh ban thep kol. Lada ka Sikkim ka la jop lane ïakhaid ha katei ka jingïakhun, kan jin da la pynkut noh shi syndon ka jingïaid lynti ka Meghalaya ha kane ka lympung.
Kumba ki nongkyrshan ki la pyndap hi smam myn ha ka sngi Thohdieng ban ai jingkyrshan ïa ka Meghalaya, la khmih lynti ba sa shisien pat kin wan ban ai mynsiem ïa kane ka kynhun mynta ka sngi Ba-ar.
Ym lah ban len ha ka sngi Thohdieng, ka Meghalaya ka la lah ban ïalehkai bha pyrshah ïa ka Sikkim, hynrei ka jingbym don ka jingïatylli lang kawei ka la pynlong ïa kane ka kynhun ba kan mad ïa ka jingshah rem bad kawei ruh ka dei na ka daw ka jingbym ïoh kylluid ka por ban pynkhreh ïa ka kynhun na ka bynta ka Santosh Trophy.
