Guwahati, Nohprah:
Ka Sribhumi District Congress ha ka sngi Thohdieng, 26 tarik u Nohprah, ka la pynlong ïa ka jingïaid paidbah da kaba rah da ki mombati ban pyrshah ïa ka jingshah pynïap beiñ jong uwei u samla Bengali ha ka District Karbi Anglong jong ka Assam, ha ka por ba dang ïaid shakhmat ka jingïakhih halor ka jingïaknieh jaka.
Ka jingïaid paidbah kaba suk ka la sdang na ophis jong ka Sribhumi District Congress bad ka la ïaid lyngba ki surok bah jong ka sor shwa ban poi sha kaba kut ha AOC Point. Ki nongtrei bad ki nongkyrshan jong ka seng ki la rah ïa ki mombati bad ki la pyrta shla, da kaba dawa ïa ka hok na ka bynta une u lanot bad ban leh da kaba tyngeh ïa kiba donkti ha kane ka kam runar.
U President ka Sribhumi District Congress u Tapas Purkayastha haba ai jingkren ha kane ka jingïalang u la pynpaw iïka jingsngewkhia kaba khraw halor kane ka jingjia.
U la ong ba tang katto katne sngi hadien ba la pynlong ïa ki ïakhih pyrshah ïa ka jingshah pynïap jong ka Dipu Das ha Bangladesh, ka jingjia kaba shyrkhei kaba kum kata ka la jia ha Karbi Anglong, ha kaba la kynnoh ba uwei u briew uba duna dkhot met u la shah thang im ha ki nongïakhih.
U Purkayastha u la buh jingkylli ïa ka jingsngap jar kaba don sawdong ka jingjia Karbi Anglong bad u la kylli balei ba kam shym la don kano kano ka jingïakhih kaba paw pyrthei lane ka jingkynthoh kaba tyngeh pyrshah ïkum kane ka kam runar kaba shyrkhei. U la ban jur ba ka jingbitar kaba jied ka pynduh ia ka jingwad ïa ka hok bad ka pynduh ïa ka jingshaniah jong ki paidbah ha ka rukom synshar.
