Imphal, Nohprah:
Ki bor pahara ki la pynlong ïa ki jingkhynra ba ïatreilang ha kylleng ki distrik jong ka Imphal East bad Imphal West ha ka sngi Thohdieng, 26 tarik u Nohprah kaba la pynlong ïa ki ban ïohkem ïa ki 8 ngut ki dkhot kiba dei na ki kynhun bapher bapher jong ka seng Kangleipak Communist Party (KCP) ba la khang pyrshah. Ki jingkhynra ki la pynlong ïa ka jinglap ïa ki tiar siat, ki tiar ïaleh, ki tiar pynïasoh ha ka jingïakren na kawei ka jaka sha kawei pat, bad kiwei kiwei ki tiar kiba long beaiñ.
Ha ka jingkhynra kaba nyngkong, ki bor pahara ki la ïoh ban kem ïa uwei u dkhot ba dang trei jong ka kynhun KCP (Ibungo Ngangom), uba la tip kyrteng kum u Kshetrimayum Binoy Singh bad kum u Kebi (41), uba shong ba sah ha Singjamei Wangma Torban Kshetri Leikai ha Imphal East district.
La kem ïa u na kawei ka ïing sah kaba don ha Langol Game Village Zone-III kaba hap hapoh jong ka Lamphel Police Station ha Imphal West district.
Na kti jong u la ïoh kurup ïa kawei ka Mobile Handset bad ka Aadhaar Card.
Ha ka jingkhynra ba kyrpang ha kane ka juh ka sngi, ki bor pahara ki la ïoh ban kem ïa lai ngut ki dkhot jong ka KCP (Taibanganba) kiba sah shipor ha Langol Game Village Relief Camp ha ka Zone-II kaba hap hapoh jong ka Lamphel Police Station. Kine ki riew shimet kiba la shah kem ki dei kiba la tip kyrteng kum u Amom Somendro Singh bad kum u Kangleibung (32 snem) na Wangoo Ahallup Makha Leikai, Bishnupur district; u RK Bishworjit Singh ba la tip ruh da ka kyrteng kum u Boinao (38 snem) na Nambol Thiyam Makha Leikai, Bishnupur district; bad u Ningthoujam Santosh Singh (30 snem) na Churachandpur Saikot Zaion Veng, Churachandpur district. Na ka kti jong ki la ïoh kurup ar tylli ki Mobile Handset.
Ha kawei pat ka jinglah pynpulom kaba khraw, la ïoh ban kem ïa saw ngut ki dkhot ba trei borbah jong ka KCP (PWG) na ka thaiñ Andro Leitanpekpham kaba hap hapoh jong ka Andro Police Station ha Imphal East district.
Kitei ki briew kiba la shah kem ki dei kiba la tip kyrteng kum u Ningthoujam Birjit Meitei ba la tip ruh da ka kyrteng kum u Tocha (36 snem), u Pangabam Meiraba Meitei ba la tip ruh kum u Nongpokngakpa (32 snem), u Mutum Norin Meetei (33 snem), bad u Ningombam Robi Meitei uba la tip kyrteng kum u Akhup (32 snem), baroh ki dei ki nongshong shnong jong ka Imphal East district.
Na ka kti jong ki, ki bor pahara ki la ïoh ban kurup kawei ka suloi .32 ryngkat bad kawei ka Magazine, lai tylli ki kuli .32 ki bym pat pyndonkam, saw tylli ki Mobile Phone, kawei ka Aadhaar card, kawei ka kali Santro kaba rong suiñ bneng kaba don ia u number MN01W 9427, bad ar tylli ki Radio Baofeng set.
