Imphal, Nohprah:
Ki shipai pahara ki la kem ïa 8 ngut ki briew kiba la shah kynnoh ba ki dei ki nongdawa pisa kiba don ka jingïadei bad ka kynhun PREPAK (PRO) ha ki jingtreikam ba ïatreilang ha kylleng ka Manipur ha ka 28 tarik u Nohprah, ha kaba ïadei bad ka jingpyntreikam kaba thymmai ïa ki kynhun dawa pisa ba la pyntreikam ha kylleng ki jaka jong ka jylla. Ïa ki 6 ngut ki shipai ki la kem na ki jaka bapher bapher kiba don hapoh ka thanat Nongpok Sekmai.
Kine kiba la shah kem ki dei kiba la tip kyrteng kum u Moirangthem Boboy Singh ba la tip ruh da ka kyrteng kum u Lalngam (54) jong ka Yairipok Kakmayai Mayai Leikai; u Thoudam Tomba Singh ba la tip ruh da ka kyrteng kum u Thengainaba (63) jong ka Soibam Leikai Khalabung Leirak; u Konsam Romenkumar Singh ba la tip ruh da ka kyrteng kum u Samitpa (44) jong ka Iroisemba Mayai Leikai; u Laishram Nanao Singh ba la tip ruh kum u Lukhoi (35) jong ka Itam Nungoi; u Takhellambam Kishan Singh ba la tip ruh da ka kyrteng kum u Nanao (30); bad u Takhellambam Washington Singh ba la tip ruh kum u Ibungo (22), kine baroh arngut ki dei na Chanam Santrok Maning Leikai.Ha kane ka jingkhynra la ïoh kurup na ki ïa ka suloi Double-barrel, ar tylli ki mobile phone bad ar tylli ki sim card.
Ha ka jingpyntreikam ba kyrpang ha kane kajuh ka sngi, ki bor pahara ki la kem sa arngut ki dkhot jong ka kynhun PREPAK (PRO) (G-5) na Yairipok Pechi kaba hap hapoh ka Yairipok Police Station kaba don ha Thoubal distrik. Kine kiba la shah kynnoh ki dei kiba la tip kyrteng kum u Lantham Poireiton Meitei ba la tip ruh da ka kyrteng kum u Lanthouba (25) na ka shnong Chanam Santrok Awang Leikai bad u Chirom Rostam Singh ba la tip ruh da ka kyrteng kum u Chiromba (25) na Kongba Laikhuram Leirak.
Ki kynhun pahara ki la ïathuh ba ka jingtohkit ka dang ïaid shakhmat ban wad ïa ki jingïadei bad ki kynhun kamai pisa kiba donkti ha ki kam dawa pisa.
