Guwahati, Nohprah:
Ka seng Congress, kaba dei ka Liang Pyrshah, ka la pynbna ba kan ïakhun ha ki 100 tylli ki konstitwensi na ki 126 tylli ki Assembly Seat ha Assam, na ka bynta ka jingthep vote ka ban sa long ha une u snem ban wan bad ban ïatreilang bad kiwei pat ki seng, lait noh bad ka seng All India United Democratic Front (AIUDF), ban pynliem ïa ka seng Bharatiya Janata Party (BJP) kaba don ha ka bor synshar.
“Ban pynliem ïa ka BJP kaba pyrshah paidbah, ka Congress kan ïakhun ïa ka ilekshon sha ka ïingdorbar thawaiï da kaba ïateh lok bad ki seng kiba don kajuh ka jingmut jingpyrkhat. Ngin ïeng kyrtong ha ki 100 tylli ki konstitwensi. Ïa ki seat kiba dang sah yn ieh na ka bynta ki seng ba ïatreilang”, la ong u heh ka Assam Congress u Gaurav Gogoi ha ka sngi U Blei ha ka ïalang kaba la long ha Tezpur ban rakhe ïa ka jingdap kaba 141 snem jong ka jingseng ïa ka seng.
