Shillong, K’Lyngkot 04
Ka lympung ïalehkai First Division Cricket League ba la pynïaid da ka Shillong Cricket Association (SCA) ka la nangjam shaphrang ha kaba ka Winds ka la pynliem noh ïa ka Metallica CC da 9 wiket ha ka sngi U Blei.
Ha kane ka jingïa-khun, ka Metallica ka la kam trai ban tied nyngkong, ha kaba ka la kamai 110 run ha ki 32.1 over. U Imran Ali u la tied 22 run na ki 59 bol bad u Rahul Biswa u la ïoh 16 run na ki 36 bol. Katba u Kenny Wann u la khur 3 wiket bad ïa ki 2 wiket la khur da u Bikash Mahato n aka bynta ka Winds.
Haba wan shimti ïa ka pali kaba ar, ka Winds ka la lah ban kynjoh sha ka thong da kaba kamai 115 run bad shah pynkhyllem 1 wiket ha ki 16.4 over. U Sameer Choudhary u la tied 42 run na ki 49 bol bad u Dipanju T Lama u la ïoh 43 run na ki 15 bol. Katba u Nikil Tapa u la khur 1 wiket na ka bynta ka Metallica. Ïa ka nam Player of the Match la khur da u Kenny Wann.
