Aizawl, Kyllalyngkot:
Ki shipai jong ka tnat Assam Rifles ki la ïoh ban kurup 11.062 kg ki dawai Methamphetamine tablet, kiba pynthut ïa ka jingmut jingpyrkhat, kiba la antad ba ka dor jong ki ha ka ïew bar ri ka long T.33.186 klur ha ka por ba ki ïatreilang hajan khappud ka Indo-Myanmar ha ka distrik Saitual jong ka Mizoram, la ïathuh ki heh sorkar ha ka sngi Thohdieng.
Kum ka jingpynsted ïa ka jingpyntreikam haba la ïoh ïa ka jingtip kaba bniah ha kaba ïadei bad ka jingkhaïi drok, ka kynhun ba ïatreilang jong ki pulit Assam Rifles bad ki pulit Mizoram ki la pynlong ïa ka jingkhynra ha ka thaiñ Kaifang.
Ki heh sorkar ki la ïathuh ba la lap ba don ki breiw kiba shang ha katei ka jaka, hadien kata la pynlong ïa ka jingtalasi kaba stet, kaba la pynlong ban ïoh kurup ïa kine ki jingdih pynbuaid.
Ïa kine ki dawai Methamphetamine kiba la ïoh ban kurup ryngkat bad kawei ka kali kaba la pyndonkam ha kane ka jingkhynra la aiti sha ki pulit jong ka jylla Mizoram ha Saitual na ka bynta ban tohkit bniah bad leh katkum ka aiñ.
Uwei u briew uba la tip kyrteng kum u Hasan Ali uba shong ba sah ha Badarpur distrik ha Assam u la shah kem ha kaba ïadei bad kane ka jingkurup.
Ha ka jingkhynra ba kyrpang ha u bnai Nohprah, ki shipai Assam Rifles, ha ka jingïatreilang bad ki pulit ka Cachar, ki la ïoh kurup haduh 3,060 tylli ki song sikret ba be-aiñ na ka thaiñ Tarapur jong ka Silchar, ha kaba ka dor jong ka ïew ka long kumba T.1.83 klur.
Arngut ki briew ba la tip kyrteng kum u Hanannan Husain Bhuiyan na Islamabad, Cachar, bad u Islamuddin Laskar na Bagha, Cachar, ki la shah kem, bad la kurup ïa kawei ka kali ha ka por ba ki pynlong ïa ka jingkhynra.
Baroh ki tiar ba la kurup bad ïa ki briew ba la shah kem la aiti noh sha ki pulit ka Cachar ban pynngat ïa ki ha ki kyndon aiñ.
Katkum ka jingpynbna ba la pyntikna, ki jingtreikam ki pynskhem biang ïa ka “jingkular ba khlem artatien” jong ka Assam Rifles ban ïakhun pyrshah ïa ka jingkhaïi tuh bad ban tehlakam ïa ka jingkhaïi beaiñ ha ki thaiñ khappud kiba sngewkhia, katba ki pynkhlaiñ ïa ki jingpyrshang ban ïada ïa ka thaiñ na ki dawai pynbuaid bad kiwei kiwei ki mar ba la khang pyrshah.
