Imphal, Kyllalyngkot:
Ka kynhun Directorate of Enforcement (ED), Imphal Sub-Zonal Office, ka la pynmih ïa ka Provisional Attachment Order (PAO) kaba ar ba la pynngat ïa ki jingdon jingem kiba la kot sha ka T. 33.66 klur, ha kaba ïadei bad ka jingkynnoh ba ka la don ka jingthok pisa kaba bun ha kaba la donkti bad ka M/s Birla Emporium Finvt Pvt Ltd bad ïa u Director jong ki u Yumnam Irabanta Singh.
Katkum ka jingpynbna ha ki lad pathai khubor ba la pynmih ha ka 1tarik Kyllalyngkot, 2026, la ong ba kane ka jingkurup ka ïadei bad ka mukotduma ba la kynnoh ba la thok ïa kumba 5,000 ngut ki nongbei tyngka ha Manipur.
Ka kynhun ED ka la sdang ïa ka jingtohkit halor ka jingmudui ejahar kaba la buh da ka kynhun CID (Crime Branch), Manipur, hapoh ki Sections jong ka IPC, ba kynthup ïa ka Section 1860, pyrshah ïa u Yumnam Irabanta Singh uba dei u Director jong ka M/s Birla Emporium Pvt Ltd bad ka M/s Ira Finance Pvt Ltd.
Ka ejahar ka la kynnoh ba hapdeng u snem 2019 bad 2021, u Yumnam Irabanta Singh u la pynïaid ïa ka skhim thep pisa bad thep pisa thok lyngba ki kompeni jong u, da kaba kular ïa ki nongbei tyngka ban ïohnong palat pud.
Hynrei hadien ba ki la lum pisa shibun na ki paidbah, la kynnoh ba ki kompeni kim shym la pynphai biang ïa ka pisa ba la thep.
Ka kynhun ED ka la ong ba katei ka skhim ka long kaba khlem jingbit bad ka la wanrah ïa ka jingduhnong kaba bakla ïa ki nongbei tyngka kaba la kot palat T.2.50 klur, katba ka pynmih ïa ka jingmyntoi kaba bakla kaba ïadei na ka bynta kiba shah kynnoh.
Ha ka jingtohkit la lap shuh shuh ba ki kompeni ki ai ram ruh sha ki paidbah pyrshah ïa ki jingdon jingem katkum Loan Against Property (LAP). Hynrei la kynnoh ba ïa ki jingdon jingem jong ki nongshim ram la pynkylla bad pynrung kyrteng ha ka kyrteng jong ki Director bad ki nongtrei jong ka M/s Birla Emporium Pvt Ltd lyngba ki kot die.
La ïathuh ba ki kompeni ki la khang noh ïa ki kam ha kaba sdang jong u snem 2020 khlem da pynphai biang ïa ka pisa ba la kular sha ki nongthep pisa.
Ki jaka ba la pynrung kyrteng ha ka kyrteng jong ki nongpynroi ruh la kynnoh ba la bat khlem da siew kylliang, bad ïa ka pisa ba la ïoh na ki kam runar la pyndonkam hadien ban ïoh ïa ki jaka ba bun jait.
Ka kynhun ED ka la pynpaw ba kham mynshwa ka la pynïasoh shipor ïa ki jaka ba lah ban kynriah bad bym lah ban kynriah kiba shongdor T.28.02 klur ha ka kyrteng jong ka M/s Birla Emporium Pvt Ltd, u Yumnam Irabanta Singh bad ki paralok jong u.
Ïa ka jingujor jong ka jingshah pynngat ban kurup ïa ki jingdon jingem ba la pynïasoh la mudui ha ka iingbishar ba kyrpang jong ka PMLA, Imphal East, ha ka 6 tarik u Jylliew, 2025.
Ka jingtohkit kaba kham bniah ka la pynlong ban lap ïa ki 121 tylli kiwei pat ki jaka bym lah ban pynkylla kiba la pynrung ha ka kyrteng jong ka M/s Birla Emporium Pvt Ltd, ka M/s Ira Finance Pvt Ltd, ka Yumnam Irabanta Singh bad ki paralok jong u, kiba la lap ba la ïoh na ka jingmih na ka kam runar. Kine ki jaka kiba la shongdor haduh T.33.66 klur, mynta la pynïasoh shipor.
Da ka hukum kaba thymmai, ka dor baroh jong ki mar ki mata kiba lah ban ïaid bad ki bym lah ban ïaid kiba la pynsah shipor ha katei ka mukotduma ka la kiew sha ka T.61.68 klur.
Ka kynhun ED ka la ong ba ka jingtohkit kaba bniah halor kane ka kam ka dang ïaid shakhmat.
