Shillong, K’Lyngkot 04
Ka kynhun ïalehkai ka Meghalaya ka la shah pynngat ha ka thup kaba kham jwat ha ka wat ba khatduh jong ka 79th National Football Championship na ka bynta ka Santosh Trophy 2025-26.
Kane ka kynhun hapoh ka jingïalam u Bah Khlaiñ Pyrkhat Syiemlieh, ka la don ha ka Group-B kaba kynthup ïa ka Kerala, Services, Punjab, Odisha bad ka Railways. Katba ka Assam, kaba la ïoh rung suk sha kane ka wat namar ka dei ka jylla ka ban pynlong ïa kane ka wat ba khatduh, ka la don ha ka Group-A kaba kynthup lang ïa ka West Bengal, Tamil Nadu, Uttarakhand, Nagaland bad ka Rajasthan.
Ïa kane ka lympung yn pynlong ha Dhakuakhana bad ha Silapathar, Assam ha kaba yn sdang naduh 21 tarik mynta u bnai.
Ka West Bengal bad ka Kerala ki la don lypa ha kane ka thup jong ka wat ba khatduh namar ki dei ki kynhun kiba la khur ïa ka nam lahduh bad wan ba-ar ha ka aïom ïalehkai 2024-25. Katba kiwei pat ki khyndai tylli ki kynhun ki la ïoh rung na ka jingïalehkai group, kaba la long ha u Nohprah jong u snem ba la lah.
Ki saw tylli ki kynhun na kawei pa kawei pat ka group kin ïoh rung sha ka quarter final, kaba la thmu ban pynlong ha ka 2 bad 3 tarik u Rymphang bad ka final kan long ha ka 8 tarik u Rymphang.
Te kumta ka Meghalaya kan ïakhun nyngkong pyrshah ïa ka Odisha ha ka 22 tarik, kumjuh ïa ka Punjab ha ka 24 tarik, ïa ka Services ha ka 26 tarik, Kerala ha ka 29 tarik bad ïa ka Railways yn sa pynbna kham hadien.
