Guwahati, K’lyngkot:
Na ka jingbteng ïa ka jingpyntreikam ha kaba ïadei bad ka jingleit thwet ïa ki nongleh jadu kaba shyrkhei bha ha ka Elaka Karbi Anglong jong ka Assam, ki pulit ki la kem ïa 18 ngut ki briew kiba donkti ha ka jingpynïap bad thang im ïa ki shijur ha ka shnong No. 1 Belguri Munda.
Ïa kine ki jingkem la pynthikna da u Inspector General of Police (Law and Order) u Akhilesh Kumar Singh ha ka 2 tarik, Kyllalyngkot.
Ki heh pulit ba kynthup ïa u IGP u Akhilesh Kumar Singh bad u Senior Superintendent of Police jong ka Karbi Anglong u Pushpraj Singh ki la hiar sha katei ka shnong ha ka sngi Thohdieng ban bishar ïa ka jinglong jingman bad ban peit ïa ka jingtohkit halor kane ka kam runar kaba la pynsaphriang ïa ka khubor kaba sngewtriem ha kylleng ka jylla.
Haba kren sha ki lad pathai khubor, u IGP Singh u la batai ïa katei ka jingjia kum “ka kam thombor kaba la pynlong da ka jingngeit biej,” bad u la ong ba ki bor pynjari aiñ ki la kut jingmut ban pynthikna ïa ka jingpynshitom kaba tyngeh ïa baroh kiba donkti.
“Ngi la dep kem ïa 18 ngut ki suba donkti, bad ka jingtohkit kaba bniah ka dang ïaid shakhmat ban pynthikna ba uwei pa uwei u nongleh kam sniew un shah pynngat ha ka aiñ bad un mad ïa ka jingpynshitom kaba jur tam katkum ka aiñ”, u la ong.
Ka jingtohkit jong ki pulit ka dang ïaid shakhmat, ha kaba ki bor pynïaid ki dang ïai bteng ban lap bad kem ïa kino kino ki nongpynmih kam kiba dang sah kiba lah ban don bynta ha kane ka kam runar.
Kane ka jingjia ka la jia ha ka sngi Thohdieng ha kaba ki paidbhur ki la pynïap ïa ki shijur, ba la tip kyrteng kum u Gardi Birua bad ka Mira Birua kiba shong ba sah ha ka shnong No. 1 Belguri Munda kaba hap hapoh ka jingpeit jong ki pulit ka Howraghat Police Station.
Katkum ki khubor na ka thaiñ, ïa ki jingpynïap briew la mih na ka jingngeit biej kaba la rim bha bad ka jingktah jong kawei ka nongleh jadu kaba la khot ïalade kum ka “blei kynthei” kaba la kam ba ka la shah bat ha ka ‘Ma Durga’ bad ka la kynnoh ba kine ki arngut ki pynmih ïa ki jingpang ha ka shnong.
Da kaba leh halor kine ki jingkynnoh, ka kynhun ki nongshong shnong kiba la rah da ki dieng bad ki nar ki la thombor ïa kine ki shijur.
Ki jingïathuhkhana jong ki nongpeitkai ki batai ïa ka jingjia kaba shyrkhei ha kaba ïa kiba shah pynïap la shoh bad mait naphang shwa bad bret ha ka ding ha ka por ba ki dang im. Ki nongsakhi ki la ïathuh shuh shuh ba kine ki arngut ki la pyrshang ban phet krad na ka ding, da kaba kyrpad ban ïoh um bad sngewsynei, hynrei la khynñiat biang ïa ki shapoh ding da ki nongthombor haduh ba kin da ïap hapoh ka phyllaw jong ka ïingsah jong ki.
Ka jingjia ka la pynpaw sa shisien ïa ka jingma kaba khraw jong ka jingngeit biej, khamtam ha ki jaka ba jngai bad kiba duk. Ki nongpeitkai na ka thaiñ ki la kdew ba ka jingduk kaba jur bad ka jingduna ka jingnang jingstad ha ka shnong ka la pynlong ïa ki nongshong shnong ban shah pyndik ha kane ka briew kaba kam bad pynbna ba ka dei ka blei, watla ka im ha ka juk kaba la pynpaw da ka jingstad saïan bad ka teknoloji.
Ki bor synshar ki la pynpaw biang ba kum kine ki kam thombor kiba don tynrai ha ka jingngeit biej yn sa ïakhun tyngeh, katba ki pynksan ruh ïa ka jingdonkam ban don ka jingpynsngewthuh bad jinghikai kaba neh ban ïada na ki jingjia ba sngewsih kiba kum kine ha ki por ban wan.
