Shillong, K’Lyngkot 05
Ka Mawlai Games & Literary Fest 2026 ka la jam sha ka sngi kaba-ar ha ka lah sngi U Blei ha kaba ka Mawlai Mawkynroh ka dangtam ha ka jingïoh bun ki takma da kaba ïoh 3 tylli ki takma ksiar.
Haba phai sha ka jingïalehkai phutbol jong ka wat kaba nyngkong (first round), ka Mawïong Umjapung ka la jop ïa ka Umjaiur da 3-1 kol, ka Nongkohlew ka la jop ïa ka Motsyiar lyngba ka tie-breaker, ka Madan Mawkhar ka la jop ïa ka Umsaw lyngba ka tie-breaker, ka Nongkwar ka la jop da 2-0 kol ïa ka Umrynjah bad ka Nongpdeng ka la jop ïa ka Ïewrynghep da 2-0 kol.
Ha ka Basketball, la lah ban pyndep ïa baroh ki jingïalehkai quarter bad ka semi final kan long mynta ka sngi Ba-ar ha kaba ka Nongkwar kan ïakhun pyrshah ïa ka Nonglum bad ka Mawïong Rim pyrshah ïa ka Mawdatbaki ha ka liang ki kynthei, katba ha ka liang ki shynrang ka semi final kan long hapdeng ka Mawïong Umjapung pyrshah ïa ka Nonglum bad ka Ïewrynghep ïa ka Mawdatbaki.
Ha ka Literary Competition jong ka ‘Tang Shi Kyntien’ bad ka ‘Kren Paidbah’ (Public Speaking), ki lahduh ki long ka Umjajew bad ka Umthlong na ki ar tylli ki kyrdan jong ka Tang Shi Kyntien.
Ha ka Public Speaking pat ha ka Category-A, ka Diamond Kharshandi na Mawïong Umjapung ka la long ka nongjop bad u Garland G Mylliem Umlong na Umthlong u la long u nongjop ha ka Category-B.
