Guwahati, K’lyngkot:
Da kaba sah sa tang katto katne bnai ban poi ka ilekshon sha ka ïingdorbar thawaiñ ka jylla Assam, ki kam saiñ pyrthei ki la nang jur ha kylleng ka jylla katba ki seng ki la sdang ban pynkhreh ïa ki jingïalap ilekshon, ki mat ïakren bad ki mat treikam jong ki. Ka seng Bharatiya Janata Party (BJP) ka la nang pynkhlaiñ shuh shuh ïa ka jingtreikam jong ka shabar da kaba sdang ïa ka prokram ban ïalap ilekshon da kaba buh da ki jingthoh kynroh ha ki katto katne ki bynta.
Ha ka 5 tarik u Kyllalyngkot, ki dkhot jong ka BJYM, Margherita, ki la pynlong ïa ka jingbuh jingthoh ha ki 20 tylli ki jaka ba bun briew ha kylleng ka Margherita, kaba long ka jingsdang ba thikna jong ka jingïalap ilekshon jong ka seng BJP ha kane ka thaiñ. Haba kren sha ki nongbud jong ka seng ha kane ka prokram, u MLA ka Margherita u Bhaskar Sharma u la pynpaw ïa ka jingsngewskhem hashwa ka ilekshon sha ka Ïingdorbar Assam ha u snem 2026, da kaba ong ba ym don kano kano ka seng saiñ pyrthei kaba don “kaba nud ne kaba shlur” ban pynliem ïa ka BJP ha kane ka jylla. U la ong ba ka seng ka la sdang ïa ka jingpynkhreh kaba pura bad ka la pynkhreh ban leit sha ki paidbah ryngkat bad ki mat bad ki jingjop jong ka.
Ki nongïalam bad ki nongbud na ki tnad bapher bapher jong ka seng BJP, kiba kynthup ïa ka Margherita BJP Sadar, Town Mandal, Mahila Morcha, bad Bharatiya Janata Yuva Morcha, ha ryngkat ki katto katne ngut ki heh nongïalam jong ka seng, ki la don lang ha kane ka jingïaleit thoh jingthoh ha ki kynroh.
Ki nongïalam jong ka seng ki la ong ba kane ka jingthoh ha ki kynroh ka thmu ban pynskhem ïa ka jingïadei jong ka BJP bad ki paidbah ha ki kyrdan ba shapoh bad ban pynphriang ïa ka jingtip shaphang ka jingthmu jong ka seng bad ka jingthmu pynroi shwa ka ilekshon ban wan.
