Shillong, K’Lyngkot 05
Ka Laitkor SC, Pay for Right Football Academy bad ka Rangdajied United FC ki la khur jingjop ha kaba sdang ïa ka Women’s Football League 2026 ba la pynïaid da ka Shillong Sports Association (SSA) ha ka lah sngi U Blei.
Ha kane ka jingïakhun kaba la long ha SSA Stadium kaba ha Polo, ka Laitkor SC ka la pynliem noh ïa ka Nongthymmai SC da 2-0 kol. Ha ka jingïakhun kaba ar, ka PFR FA ka la jop haduh 8-0 kol ïa ka Mawkasiang SC.
Haba phai sha kawei pat ka jingïalehkai kaba khatduh, ka Rangdajied United FC ka la pynliem noh ïa ka Nongrim Hills SC da 5-0 kol.
Kane ka lympung kan bteng biang ha ka sngi Ba-ar ha kaba ka Lawai SC kan ïakhun pyrshah ïa ka Lumparing SC ha ka por 10:30 mynstep, kumjuh ka Mawshubuit SC ïa ka Umrynjah SC ha ka por 12:30 mynsngi bad ka New Challenger FA ïa ka Kharang SC ha ka por 2:30 nohphai sngi.
