Shillong, K’Lyngkot 05
Ka Manchester United ha ka lah sngi U Blei ka la weng noh ïa u coach jong ka, u Ruben Amorim, hadien katto katne kynta ba une u nong Portugal u la kren halor ka jingïakynad hapoh ka klob hadien ba ka kynhun jong u ka la ïakhaid bad ka Leeds United da mar 1-1 kol ha ka sngi U Blei.
U Amorim u la ong ba ki nongpynïaid jong ka klob ki donkam ban “leh ïa ka kam jong ki” bad ba dei ban ailad ïa u ban trei khlem da shah tuklar.
Ka jingïakhaid da mar 1-1 ha Elland Road ka dei ka jingïakhun ba khatduh jong u Amorim ha ki 14 bnai kiba u la shimti ban pynïaid ïa kane ka klob. Kane ka jingïakhaid ka la pynlong ïa ka Manchester United ban don ha ka kyrdan kaba hynriew ha ka Premier League hadien 20 tylli ki jingïakhun.
“Da ka jingdon ka Manchester United ha ka kyrdan kaba hynriew ha ka Premier League, ki nongïalam ka klob ki la shim ïa ka rai ban wanrah ka jingkylla,” la ong ka kyrwoh na ka United. “Kane kan ailad ïa ka kynhun ban kyntiew sha ka kyrdan ba kham shakhmat ha ka Premier League.”
La khmih lynti ba u Darren Fletcher, uba long u nongïalehkai barim bad uba dei ruh u coach jong ka kynhun Under-18, un shimti shipor ïa katei ka kynhun. Te kumta ka jingshimti ka jong u na ka bynta ka jingïalehkai kaba nyngkong kan long ha Burnley ha ka sngi Balang. Kane ka klob ka la khmih lynti ba kan thung ïa u coach uba pura ha ka aïom lyiur.
Kumba ka paw u Amorim u la shah kynthoh halor ka polisi pynïaid ïa ka kynhun da kaba u ju pynneh 3-4-3. Shwa ka jingïalehkai bad ka Leeds, u la kren shaphang ki jingïapher halor ka rukom ïalehkai bad ki jingeh ban soi ïa ki nongïalehkai kiba ïahap bad ka rukom pynïaid ka jong u. Te kumta u la pyndonkam biang da 3-4-3 pyrshah ïa ka Leeds.
