Shillong, K’Lyngkot 06
Ha ka sngi kaba lai jong ka Mawlai Games & Literary Fest 2026, la sakhi ïa ka jingwan shim bynta shitrhem bha jong bun ki khynnah lem bad ki samla bad wat ki rangbah ruh na ki dong bapher bapher jong ka shnong Mawlai ha ki jingïalehkai bapher bapher kiba kynthup haduh ka Athletics, ka Boxing, ka ïakop tyrko lem bad kiwei kiwei.
Ha ka Boxing kaba la sdang ha ka sngi Ba-ar ha ki lai tylli ki kyrdan jong ki rta 12-14 snem, 14-16 snem bad 16-18 snem jong ki shynrang ha ki jingkhia ki bapher bapher la sakhi ïa ki heprit ka shnong Mawlai ki la pyni shisha ïa ka sap ïalehkai ka jong ki. Kane ka jingïakura kan dangbteng ha ka sngi kaba bud ha kiwei pat ki rta bad jingkhia jong ki shynrang bad kynthei.
Ha ka Athletics kaba kynthup ïa ki ‘track and field’ jong ki Under-14, Under-16, Under-18 bad Senior jong ki kynthei bad shynrang, la lah ban pyndep ïa bun ki jingïalehkai kum ka 60m, 100m, 200m, 400m, 600m, 5000m, Long Jump, High Jump, Shot put bad Javelin throw bad ki jingïalehkai final kin long ha ka sngi Balang.
Ha ka Basketball, la lah ban pyndep ïa ka semi final ha ka lah sngi U Blei ha kaba ha ka liang ki kynthei, ka Nonglum ka la jop ïa ka Nongkwar bad ka Maw-datbaki ka la jop ïa ka Mawïong Umja-pung, kat-ba ha ka liang ki shynrang pat ka Mawïong Umjapung ka la jop ïa ka Nonglum bad ka Ïewrynghep ka la jop ïa ka Mawdatbaki. Te kumta ka jingïakhun final jong ka Basketball kan long ha ka 9 tarik.
Ha ka Football, ka Mawsiatkhnam ka la jop ïa ka Kynton Massar da 2-1 kol, ka Umthlong ka la jop da 2-0 kol ïa ka Mawïong Rim, ka Syllaikariah ka la jop ïa ka Umjajew da 5-0 kol bad ka Nongkwar ka la pynliem noh ïa ka Madan Mawkhar da 3-0 kol.
Haba phai sha ka H Literary Competition jong ka jingïakop tyrko (quiz) kaba ka phang jong ka Category-A ka dei “Ka Social Media ka long ka jingkyrkhu ïa ka Jaitbyn-riew” la jop da ka Dia-mond Kharshandi na Mawïong Umjapung bad uba jop pat ïa ka Category-B dei u Frederick Mylliem Um-long na Umthlong bad ka phang kaba ki ïa tyrko ka dei “Ka jingpyndonkam Artificial Intelligence da ki samla pule ka kyntiew ïa ka pule ka puthi ha ka Jylla”.
