Shillong, K’Lyngkot 06
Ka lympung ïalehkai Women’s Football League 2026 ba la pynïaid da ka Shillong Sports Association (SSA) ka la nangjam shaphrang ha kaba ka Lumparing SC, Umrynjah SC bad ka New Challenger FA ki la khur jingjop ha ka sngi Ba-ar.
Ha kane ka jingïakhun kaba la long ha SSA Stadium kaba ha Polo, ka Lumparing ka la pynliem noh ïa ka Lawei SC da 2-0 kol. Ïa kine la thep da ka Lishaphulda Khongsit ha ka minit kaba 36 bad ka Ïaphisha Marbaniang (61).
Kumjuh ha ka jingïakhun kaba ar, ka Mawshubuit SC ka la shah rem noh ha ka Umrynjah SC da 0-1 kol bad kane ka la wan urlong lyngba ka Aparajita Rabha, kaba la ïoh ban thep ha ka minit kaba 49.
Haba phai pat sha kawei pat ka jingïakhun kaba khatduh, ka New Challenger FA ka la pynliem noh ïa ka Kharang SC da 1-0 kol bad ïa kane la thep da ka Happily Lyngdoh ha ka minit kaba 12.
Ka jingïalehkai ha ka sngi Balang kan don tang kawei ha kaba ka Lawsohtun SC kan ïakhun pyrshah ïa ka PFR F.A ha ka por 2:30 nohphai sngi.
