Shillong, K’Lyngkot 06
Ka Prithivi Event & Sports ha ryngkat ka jingïasnohkti lang jong ka PFR Football Academy kin pynlong ïa ka 1st U-15 Shillong International Youth Cup ka ban sdang naduh ka 12 haduh 17 tarik mynta u bnai ha madan Nongkrem.
Ha kane ka lympung yn wan shim bynta da 16 tylli ki kynhun kiba kynthup ïa 4 tylli napoh ka Jylla, 11 tylli na kiwei ki jylla bad kawei ka kynhun nabar ri kaba na Nepal.
Ki kynhun kiba napoh ka Jylla ki long ka PFR Football Academy, Little Star Academy, Baichung Bhutia Football School Shillong bad ka Nongkrem SC. Kiwei pat ki kynhun kiba nabar ka jylla ki kynthup na Assam, Manipur, Sikkim, Arunachal Pradesh bad ka kynhun nabar ka ri ka dei ka Katari FC napoh Nepal.
Ka jingïakhun ha katei ka sngi plie kan long hapdeng ka Nongkrem SC pyrshah ïa ka Sagolban Utd kaba na Sikkim ha ka por 9 baje mynstep.
Na kane ka lympung yn jied ruh ïa uwei u rangïalehkai ba kynsai bad un ïoh ka jingshah hikai ei ne ka Free Coaching Camp kaba 15 sngi bad ka klob kaba na Spain bad ki klob pat ki ban ïoh ban rung sha ka semi final ha kane ka lympung kin ïoh ka lad ban ïashim bynta ha ka International Tournament ka ban long ha Indonesia ha u Ïaïong mynta u snem bad kin lait ïa ka jingsiew ïa ka bai pynrung kyrteng, hynrei ka klob kan hap ban pynbiang tang ïa ka bai leit bai wan bad bai sah jong ki khynnah.
