Agartala, Kyllalyngkot:
Ki pulit ka Tripura ha ka 5tarik Kyllalyngkot ki la kem ïa u nongïalam ka Youth Congress u Shahjahan Islam halor ka jingjia kaba la jia ha u snem 2025 ha Shantipara kaba la pynmih ïa ka jingkulmar kaba jur ha kylleng ka nongbah, ong u Superintendent of Police (SDPO) u Sadar Deba Prasad Roy.
Haba kren sha ki lad pathai khubor, u Roy u la ong ba u Islam u la kren bun tylli ki jingkren kiba la pynmih jingïakynad ha katei ka jingjia, ha kaba katto katne na kitei ki jingkren ki dei kiba la kren pyrshah ïa u Myntri Rangbah ka jylla, hadien kata la buh da ka jingujor pyrshah ïa u.
Katba u hynmen jong u u Khairul bad u kpa jong u ki la shah kem kham hashwa ha kane ka kam, u Shahjahan Islam u la phet rieh bad sah slem shabar ka jylla.
“Ha kine ki ar ne lai sngi ba la dep, ngi dang ïoh jingtip ba u rieh tngen ha ka thaiñ Jaipur. Da kaba pynshong nongrim ha ki jingtip ba kyrpang, ngi la leit thwet bad kem ïa u mynta ka sngi,” ong u SDPO bad bynrap ba ka jingtohkit ïa une uba shah kynnoh ka dang ïaid mynta bad ïa ki jingtip ba kham bniah yn sa ïasam hadien.
Ha ka khubor ba kyrpang, u Roy u la pynthikna ruh ba uwei u nong Bangladesh u la shah kem ha ka thaiñ Krishnanagar ha ka miet jong ka sngi U Blei. Une u briew uba la shah kem, u dei uba la tip kyrteng kum u Babul Mia, uba dang shah tohkit ruh ha ki pulit.
