Imphal, Kyllalyngkot:
Ka Indigenous People Organisation Manipur (IPOM) ha ka lah sngi U Blei ka la weng noh ïa ka jingkhot jong ka ban khang khyrdep 24 kynta ha baroh kawei ka jylla hynrei ka la kyntu ïa ki briew ban bud ryntih ïa ka jingsangeh treikam kaba 24 kynta bad ban pynlong ïa ki jingïakhih ha kylleng ki jaka ban pynrem halor ka jingthombor pynbthei bom ba dang jia shen ha Bishnupur distrik.
Ka IPOM kham hashwa, ryngkat bad ka All Manipur Students’ Union (AMSU), ka Yelhoumee Kanba Lup bad kiwei kiwei ki sengbhalang, ki la pynbna ban khang lut naduh shiteng miet kum ka jingpyrshah ïa ka jingpynbthei ïa ki bom IED ha kaba ki la don ar ngut ki briew kiba la mynsaw.
Haba pynbna ïa ka prokram ba la pynkylla thymmai, ka IPOM ka la ong ba ki nongshong shnong ki dei ban pynlong ïa ki jingïakhih kaba jai jai ban pyrshah ïa kaei kaba ka la batai kum ka jingpyrshang ba man ka por jong ki riew sniew kiba don tiar ban pynthut ïa ka jingsuk bad jingshngaiñ ha ka jylla.
Watla la weng noh ïa ka jingkhang, katto katne ki jaka pule ki la dep pynbna shuti ha ka 6 tarik u Kyllalyngkot, bad ki bor pynïaid ki la ai jingmut ïa ki khynnah skul bad ki kmie ki kpa ban pynthikna ïa ki por pule bad ki skul bad ki kolej shimet shimet.
