Shillong, K’Lyngkot 07
Ka jingïai ap khmih lynti ka la wan urlong ha kaba ïa ka lympung ïalehkai Indian Super League (ISL) yn sdang naduh 14 tarik u Rymphang mynta u snem, la pynbna u Myntri ka tnat ïalehkai ka Sorkar Pdeng u Mansukh Mandaviya.
“Namar ki kynrum kynram ha ïingbishar, ka la don shibun ka jingbym thikna halor ka Indian Super League, hynrei mynta ka sngi ka Sorkar bad ka AIFF ryngkat bad ki nongmihkhmat jong ki klob jong baroh 14 tylli ki klob ki la rai ban sdang biang ïa kane ka lympung,” la bynrap u Mandaviya ha ka sngi Ba-ar.
Kumba ka long mynta, u Mandaviya u la pynbna ba baroh ki 14 tylli ki klob ki la mynjur ban ïalehkai ha ka ISL mynta ka samoi, hynrei u CEO jong ka NorthEast United u Mandar Tamhane u la ïathuh ba ki don 10 tylli ki klob kiba la pynthikna, hynrei saw tylli kim pat pynthikna.
U Tamhane u la bynrap ba la pyndep ïa ka rukom ïalehkai, ha kaba ki klob kin ïalehkai kawei ïa kawei pat ha ki jingïalehkai ha ïing bad shabar mynta ka samoi. Kane ka mut ba don ki kynhun kiba ïakhun hynriew tylli ki jingïalehkai ha ïing, katba kiwei pat kin ïakhun hynñiew sien. Na ka liang u Tamhane u la kyntu ba kaba biang eh kaba pynlong ha la ki jaka ban ïa kaba pynlong tang ha kawei ka jaka.
U Tamhane u la bynrap ba ki don ki klob, kum ka Kerala Blasters bad ka Bengaluru FC, kiba kamai bha na ka jingdie ïa ki tiket na ka bynta ki jingïalehkai ha la ïing, katba ki don kiwei pat ki klob kiba don ïa ki nongkyrshan na la ki jong ki jaka ki lah ban duh ïa ka khajna lada kim ïalehkai ha ïing.
“La shna ïa ka central pool kaba T.25 klur tang na ka bynta ban pynlong ïa ka ISL. 10 percent na kane ka pisa kan wan na ka AIFF, 30 percent kan wan na ka kompeni kaba pynïaid ïew, hynrei namar ba ngim don mynta, ka AIFF kan ïashim bynta da kata ka jingnoh synñiang,” ong u president jong ka AIFF, u Kalyan Chaubey.
“Ha baroh, ka AIFF kan ai T.14 klur na ka bynta ka ISL bad kumba 3.2 klur na ka bynta ka I-League tad haduh ba ngin da ïoh ïa ki kompeni ki ban bei tyngka,” u la bynrap.
Ka I-League, kaba don 11 tylli ki kynhun, ruh kan sdang ha u Rymphang, ha kaba ka jingïohnong na ki kompani ba ïateh lok kan long kaba kongsan na ka bynta ka AIFF, ban pynlong ïa ki ar tylli ki lympung ban ïaid beit ïaid ryntih, bad ban thaw ïa ka plan kaba jrong na ka bynta ban bteng ïa ka samoi ïalehkai ka ban wan.
Kane ka pynkut ïa ki bnai jong ka jingbym thikna ha kaba ïadei bad ka phutbol ha India, ha kaba ka ISL kan sdang biang hadien khyndai bnai, hadien ba la kut noh ka jingïamynjur jong ka Master Rights Agreement hapdeng ka AIFF bad ka Reliance’s Football Sports Development Limited ha u Nohprah jong u snem 2025.
