Shillong, K’Lyngkot 07
Ka Shillong Cricket Association (SCA) ka la sdang ïa ka lympung ïalehkai Third Division Cricket League ha ka sngi Balang ha madan Urkaliar Shillong ha kaba ka YouthStar CC ka la pynliem noh ïa ka Akademia Langsning da 82 run.
Ha kane ka jingïakhun ka Akademia Langsning kaba la jop ïa ka kynting pisa, ka la ailad ïa ka YouthStar ba kan tied nyngkong kaba ka la kamai 200 run bad shah pynhap 4 wiket ha ki 20 over. U Mrinmoy Das u la khyrwit 84 run na ki 49 bol bad u Ayush Sharma u la tied 48 run na ki 34 bol. Katba u Aibor Marbaniang u la khur 2 wiket bad ïa ka 1 wiket la khur da u Damechwa Khongsngi na ka bynta ka Akademia.
Haba wan beh ïa ka thong, ki nongtied ka Akademia Langsning ki la shah pynkhyllem lut baroh bad ban kamai 118 run ha ki 17.4 over. U DP Tynsong u la tied 17 run na ki 10 bol bad u Gavin Nongkynrih u la ïoh 17 run na ki 19 bol. Katba u Sagar Sharma u la khur 4 wiket bad ïa ki 2 wiket la khur da u Aditya Chaudhary. Ïa ka nam Player of the Match la khur da u Mrinmoy Das.
